Ekonomia e Ukrainës duhet të stabilizohet gjatë vitit të ardhshëm dhe të rritet me deri në 15.5% në vitin 2023, në varësi të zhvillimeve ushtarake të luftës kundër Rusisë, e cila filloi më 24 shkurt, tha ministrja e ekonomisë e Ukrainës në një intervistë për Reuters.
Julia Svyrydenko, e cila shërben gjithashtu si zëvendëskryeministre e parë, tha se zyrtarët e qeverisë janë duke përgatitur parashikime makroekonomike përpara fillimit të negociatave muajin e ardhshëm me Fondin Monetar Ndërkombëtar për një program të ri të huadhënies.
E rrethuar nga thasët e rërës në bodrumin e Kabinetit të Ministrave pas paralajmërimeve të shtuara për sulme të mundshme në Kiev, Svyrydenko tha se parashikimet aktuale për produktin e brendshëm bruto në vitin 2023 varionin nga një rënie e mëtejshme prej 0.4%, deri në një rritje prej 15.5%, pas rënies së mundshme të ekonomisë me 30-35% këtë vit.
“Ne e kuptojmë se duhet ta bëjmë ekonominë që të ecë përpara. Është shumë e vështirë për të bërë parashikime të reja, për shkak të pasigurisë. Ҫdo gjë varet plotësisht nga lufta,” shtoi Svyrydenko.
Megjithëse Svyrydenko nuk pranoi të specifikonte se çfarë shume do të kërkonte Ukraina nga FMN-ja, ajo tha se programi i ri duhet të ishte “relativisht i madh” dhe duhej të miratohej sa më shpejt, për të ndihmuar në çlirimin e fondeve nga kreditorët e tjerë dhe për të bërë investitorët që të ndihen të sigurt.
Oleg Ustenko, një këshilltar ekonomik i Presidentit Volodymyr Zelenskiy, tha këtë muaj se një hua nga FMN prej 5 miliardë dollarësh për 18 muaj mund të shërbejë si një pikënisje për një paketë më të madhe prej 15-20 miliardë dollarësh nga kreditorët e tjerë.
Kjo shifër ishte afërsisht sa shuma që guvernatori i bankës qendrore të Ukrainës, Kyrylo Shevchenko, kishte identifikuar si një objektiv për financimet nga FMN-ja për dy ose tre vite, megjithëse ekspertët thanë se një shumë kaq e madhe do ta bënte Ukrainën që të tejkalonte “kufirin e jashtëzakonshëm të aksesit” të FMN për huadhënien.
Dimri që po afron
Programi i mëparshëm i huasë prej 5 miliardë dollarësh mes Ukrainës dhe FMN-së u anulua në mars, pasi FMN miratoi një fond prej 1.4 miliardë dollarësh për financimin emergjent dhe me kushte të reduktuara gjatë javëve të para të luftës, të cilën Rusia e quan një “operacion special ushtarak”.
Ukraina, e cila u përball me zhvendosjen e rreth 7 milionë njerëzve brenda vendit dhe largimin e miliona të tjerëve që kanë shkuar në Europë, po përgatitet për atë që ka shumë të ngjarë të jetë një dimër brutal, i cili do të sjellë mungesa të energjisë, rritje të inflacionit dhe përkeqësimin e krizës humanitare.
Svyrydenko u kërkoi vendeve dhe institucioneve donatore që të përmbushin premtimet e tyre për ndihmë.
Ukraina ka marrë 12.7 miliardë dollarë në mbështetje buxhetore ndërkombëtare nga vende dhe institucione të tjera që nga fillimi i pushtimit të Rusisë, si dhe pret rreth 14 miliardë dollarë ndihma të tjera që janë premtuar se do të vijnë përpara fundit të vitit, tha ajo.
“Është shumë e rëndësishme për ne që të vazhdojmë të marrim këtë ndihmë financiare – dhe ndihma të tjera – nga partnerët tanë,” tha ajo.
“Ne po luftojmë në mbrojtje të atyre vlerave që janë të rëndësishme për Europën dhe për Shtetet e Bashkuara.” Reuters
