Nëse i hedh një vështrim autorëve të dyshuar të krimeve orët e fundit, shumica janë të rinj, mundësisht nën 25 vjeç.
Ky brez është edhe më fatkeqi ndër ne.
Fatkeq sepse për ta, modeli është llumi dhe ata s’kanë një magnet tjetër që ti tërheq sesa forcën që llumi ka për të mbajtur rreth vetes sa më shumë të rinj e për ti bërë të ngjashëm me të.
Një i ri i kësaj moshe sot, ka parë se të kesh sukses duhet të jesh i botës së krimit.
Të jesh i pranuar në shoqëri, duhet të kesh një makinë luksi. Luks i cili vjen vetëm nga paraja e pistë e që prodhon asgjë veçse krim.
Një i ri 20 vjeç sot, e di se të kesh të dashur një vajzë të bukur, duhet të kesh shumë lekë, jo mendje. Atë nuk mund ta kesh dot nëse ti je studenti më i mirë i fakultetit ama mund ta kesh nëse ti je më i pasuri që shkon te kafja e fakultetit.
Një e re sot e di se e vetmja mënyrë për të ecur para është të bëhet eskortë e klubeve të natës në bllok e jo vetëm. Ajo e di se kështu, rrit pjacën e saj dhe bën një jetë luksi.
Nëse i hedh një sy rrjeteve sociale (meqë jemi dhe në periudhë pushimesh) ti shef femra që bëjnë pushime luksi. A e krijon puna këtë luks ? Në mbi 80% të rasteve jo. E krijon të qenit eskortë. Ai që financon, nuk është gjë tjetër veçse një djalë i botës së krimit ose një tjetër që ka babain të pasur nga paratë korruptive.
Kjo e fundit, është një tjetër kategori që fut rininë në kurthin e modelit të keq sepse një adoleshent kur sheh shokun e tij që ka babain drejtor dhe lëviz me mercedes 50 mijë euro, atëherë tërhiqet të hyjë në botën e krimit për ta pasur edhe ai atë luks
Në Shqipëri nuk nderohesh nëse ti je një profesionist i mirë. Ama nëse ti ke një makinë luksoze apo nëse je hajdut tenderash, të hapet dera kudo.
Nëse ti je i drejtë ke gjithnjë e më pak shokë, ama nëse ti lëviz me armë dhe lekë droge, ti je i preferuari.
E çbën rinja në këtë rast ? Endet të bëhet si ata.
Është rastësi që shumë djem shqiptarë punojnë në shtëpi bari (laboratore hashashi) në Angli ? Jo. Ata e dinë se ky është modeli pozitiv që i bën të pranueshëm në shoqëri.
Pak kohë më parë Dubai ishte qendra e debatit për vajzat shqiptare dhe kriminelët tanë që enden asaj bote dokush si eskortë e dikush për tju fshehur drejtësisë tonë.
Sot, Dubaizimi i jetës sociale ka zbritur në Shqipëri duke e tërhequr rininë në një rrugë që fundin e ka humnerë.
Ndaj edhe puna për të dalë nga ky batak është sfilitëse e pse jo edhe e dështuar.
Familja që prej dekadash është gjithnjë e më pa busull, e ka humbur forcën për të qenë shpëtimtare e të rinjve që ajo prodhon ndaj edhe gjithnjë e më shumë, modeli i gabuar po na sjell pasoja të frikshme.
