Që mos t’na vijë turp nga fëmijët, pse jemi treguar korrekt në detyrat që kemi patur.
SPAK aao KAPëS ?
Kjo është pyetja që shtrojnë shqiptarët në bisedat midis tyre.
Në fakt është pyetje, përgjigja e së cilës ka zhgënjyer që nga momenti i krijimit të strukturës speciale të hetimit.
Kjo strukturë e krijuar në vitin 2018, në kuadër të reformës në drejtësi, ngriti pritshmëritë në opinionin publik për luftën ndaj të korruptuarve në nivelet e larta të qeverisjes.
Pritshmëri, të cilat, nuk ndodhën për vite me radhë dhe shqiptarët, si zakonisht, s’ju mbeti tjetër, veç të përsëritnin formulën trishtuese:
“Ky vend nuk bëhet !”
Opinioni publik në këto vite është njohur me vjedhje galopante, që buronin nga aty, ku menaxhoheshin fondet e buxhetit të shtetit.
Pra taksat, gjaku i qytetarëve, thithej si shushunja nga ata që u ishin besuar për administrim.
Konçesione e PPP, të cilat nuk prodhonin asnjë dobi, veç mbushnin llogaritë bankare të 100 miqve të qeverisë, por edhe vetë qeveritarëve.
Denoncime pa fund, por heshtje…
SPAK u stigmatizua si KAPS ose S’KAP.
Përfundim i tillë ishte traumatik dhe zhgënjyes për shoqërinë e drobitur shqiptare.
Aktualisht, nën ndikimin e të tjerë faktorëve, duket se diçka po lëviz.
Arrijmë në këtë konkluzion pjesor duke referuar rastin e ish ministrit Koka, ish zv.ministres Voda, thirrjes së ish ministrit Beqa, apo ndonjë rasti tjetër.
Sporadike janë këto ndodhi, por gjithësesi lindin shkëndijën e shpresës.
A mjafton ?
Jo !
E përciptë krejt kjo lëvizje, por një nisje.
Suksesi i SPAK, nuk është as thirrja, as hetimi, as dënimi me dy apo më shumë vite burg.
Jo, suksesi do të jetë, kur ata të zhvishen nga pasuritë marramendëse, të sekuestrohet gjithçka, që ka shijen e kripës së djersës shqiptare.
Ne e dimë, se këta edhe nipërit i kanë milioner pa punuar asnjë ditë.
Aq keq luajnë me lekun sa na vjen turp nga fëmijët pse jemi të ndershëm.
Kush është detyra e SPAK?
Ja çfarë shkruhet në faqen zyrtare të institucionit:
“Prokuroria e Posaçme ushtron ndjekjen penale dhe përfaqëson akuzën në emër të shtetit para Gjykatave të posaçme, merr masa dhe mbikëqyr ekzekutimin e vendimeve penale, si dhe kryen detyra të tjera të ngarkuara me ligj. Prokuroria e Posaçme i kryen funksionet e saj në mënyrë të pavarur, nëpërmjet prokurorëve të posaçëm, të cilët emërohen nga Këshilli i Lartë i Prokurorisë në përputhje me këtë ligj”.
Pra, në mënyrë të pavarur…
Kaq kërkojnë shqiptarët, pavarësinë dhe mos ndikimin nga Qeveria.
Nëse ndodh kjo Shqipëria bëhet dhe shtohen nja dy burgje për hajdutë qeveritar..
