Ministria e Brendshme e Britanisë së Madhe ka kthyer ditën e djeshme në Shqipëri 26 shqiptarë të dënuar për krime të ndryshme duke nisur që nga rrëmbimi, trafiku i drogës, dhuna etj.
Të dënuarit me plot 88 vjet burg gjithsej janë rikthyer në atdhe përmes një fluturimi charter.
Tre prej këtyre personave kishin hyrë ilegalisht në Mbretërinë e Bashkuar, të tjerët janë dënuar me 20 vite burg për trafik droge ndërsa një tjetër ishte dënuar me më shumë se 4 vite burg për rrëmbim dhe sulm ndaj personit.
Një tjetër shqiptar rezultonte i dënuar me pesë vjet burg për armëmbajtje pa leje, ndërsa një tjetër që bën pjesë në listën e të dëbuarve kishte hyrë në Britani muajin e fundit me anë të gomones për një jetë më të mirë.
Gjithashtu, një tjetër u kap për trafik droge gjatë një kontrolli rutinë. Sipas policisë, ai kishte mbërritur në Mbretërinë e Bashkuar nga Gjermania duke përdorur një pasaportë false, por nuk mbante mend se kur kishte hyrë në vend. Ai pranoi të rikthehej vullnetarisht në Shqipëri.
“Këta kriminelë janë përgjegjës për veprat e trafikimit të drogës dhe armëve, ata po shkatërrojnë familjet dhe komunitetin tonë. Ata kanë shkelur ligjet dhe vlerat tona, ata kanë krijuar plagë në shoqërinë tonë me krimet e tyre. Ne po vazhdojmë të largojmë kriminelët e huaj dhe ata që nuk kanë të drejtë të qëndrojnë këtu’” është shprehur para disa ditësh ministrja e Brendshme angleze, Priti Patel.
