Deputetët konservatorë e përshëndetën me duartrokitje daljen e fundit të Boris Johnson, si kryeministër i Britanisë së Madhe.
Ai u shpreh në fjalimin e fundit se u përpoq për të nxjerrë vendin nga situata e pandemisë së Covid, si dhe për të shpëtuar Ukrainën nga barbaria e pushtimit rus.
“Ne ndihmuam, unë ndihmova për ta nxjerrë këtë vend nga pandemia dhe për të ndihmuar në shpëtimin e një vendi tjetër nga barbaria. Dhe, sinqerisht, kjo është e mjaftueshme për kursin. Misioni u krye në një masë të madhe. Dua t’i falënderoj të gjithë këtu dhe “hasta la vista, baby”, u shpreh Johnson.
Kujtojmë se Boris Johnson dha zyrtarisht dorëheqjen nga posti i kreut të qeverisë britanike dhe nga drejtimi i konservatorëve, pas një sërë skandalesh në qeverinë e tij dhe kërkesës së vazhdueshme të zyrtarëve të Partisë Konservatore për të dhënë dorëheqjen.
