Paratë e grupit mafioz të ‘Ndrangheta-s” ishin fshehur në vazo të mëdha. Sipas torinotoday.it, bosët e drogës i kishin
“varrosur” kartëmonedhat në kopshtin e banesave të tyre.
Kontrollet u bënë nga karabinierët në orët e para të mëngjesit të së martës (12 korrik), në kuadër të një operacioni të gjerë kundër krimit të organizuar në Torino dhe pjesë të tjera të vendit.
Në krye të grupit, sipas hetuesve, është bosi 43-vjeçar Vittorio Raso, i arrestuar 22 qershorin e kaluar në Barcelonë, i cili drejtonte trafikun e drogës nga Spanja.
Gjatë kontrolleve, punonjësit e policisë kanë konfiskuar rreth 800 kilogramë drogë të llojeve të ndryshme, dy pistoleta, tre pushkë, 12 kilogramë eksploziv, qindra municione dhe një milion euro në prerje të ndryshme.
Një pjesë e këtij thesari u gjet falë përdorimit të detektorëve metalikë, të cilët zbuluan vazot e mbushura me para, të cilat, pasi u nxorrën në sipërfaqe, zbuluan një trashëgimi të vërtetë.
Operacioni përfshiu provincat e Torinos, Milanos, Varese, Alessandria, Napoli dhe Asti.
Sipas hetuesve, xhiroja e organizatës mund të llogaritet në disa milionë euro. Aktiviteti kryesor i grupit është trafiku i drogës. Komunikimet mes anëtarëve të grupit bëheshin nëpërmjet një rrjeti të posaçëm celularësh të koduar, blerja e të cilëve bëhej jashtë vendit.
Gjatë operacionit të sotëm, u arrestuar 26 persona, 6 prej të cilëve u vendosën në arrest shtëpie, të akuzuar për trafik ndërkombëtar të drogës, armëmbajtje pa leje dhe pastrim parash.
