Ofendimi i radhës i personelit shëndetësor, tjetër shkak për të protestuar!
Deklaron Qeveria me pompozitet suksesin e saj, i rritet 6% rroga personelit mjekësor prej muajit Korrik!
Të bëjmë një llogari të thjeshtë:
Prej Korrikut deri në fund të vitit janë 6 muaj, pra 1/2 e vitit.
Kjo do të thotë se rroga është ritur me vetëm 3% në nivel viti.
Nga ana tjetër inflacioni deri tashti është 5,9% dhe jo vetem që nuk do të ulet edhe për 6 mujorin e dytë, por mund të rritet.
Sidoqoftë e pranojmë se do të ngelet kaq, pra 5,9% në nivel viti.
Ndërsa paga ritet me 3% në nivel viti, gjë që indekson vetëm gjysmën e inflacionit.
Pra në fakt jo vetëm nuk ka asnjë ritje page, por ka ulje prej 3% ne nivel te 2022 prej ritjes së inflacionit!
Kjo është e vërteta, që na bën të jemi të fundit në Rajon e Europë për pagat e personelit shëndetësor.
Dhe pastaj Qeveria deklaron se nuk janë pagat që detyrojnë mjekët, Infermierët, fizioterapistët, farmacistët etj te braktisin vendin.
Sot kemi arritur në 1 mjek për 1000 banorë, shifer kolapsi kjo për sistemin.
Dhe eksodi vazhdon me mijëra, më shumë janë largimet nga vendi se sa diplomimet e reja çdo vit, pa llogaritur daljet në pension e humbjet e tjera.
Jam dakort që nuk janë vetëm pagat që detyrojnë mjekët të largohen.
Përveç tyre janë kushte diskretituese të punës, niveli i ulët teknologjik e shkencor i institucioneve, mundësitë minimale për kualifikime e super specializime, terorizimi i tyre nga arbitrariteti i pushtetit etj.
Është dhe diskriminimi që u bëhet çdo ditë së bashku me përbuzjen ndaj tyre, të shoqëruar me “tallje” të tilla si kjo sot e pagave.
Prandaj ky personel ka shumë për çfarë të protestojë e kërkojë nesër me 7 Korrik, së bashku me të gjithë të tjerët!
