Ligji nr. 55/2015 për Investimet Strategjike, një strategji e pastër për grabitjen e pronave publike.
Në fakt, këtë ligj, unë e perceptoj pjesërisht si Reforma Agrare e 1946, por reformë e kamufluar në kohët moderne.
Ky ligj u miratua me argumentin se synonte nxitjen dhe tërheqjen e investimeve strategjike të huaja, në sektorët e ekonomisë, të identifikuar prej ketij ligji si strategjike.
Në funksion të kësaj ideje, “de jure” u parashikua vendosja e proçedurave të posaçme administrative favorizuese, lehtësuese apo përshpejtuese të mbështetjes dhee të shërbimeve ndaj investitorëve.
Ç’ndodhi, ç’po ndodh ?
Në fakt, oligoshteti u dha Statusin e Investitorëve Strategjik, miqve të oborrit qeveritar, bijëve e nipërve të ish nomenklaturës komuniste apo njerëzve të lidhur me të majtën në atë kohë e në këto kohë.
Rasti i gaztorit, birit të Luftar Pajës, mbetet më emblematiku në qartësinë se çfarë realisht kishte/ka ligji për të cilin shkruaj.
Jo vetëm kaq, burri me fat i ministres Xhaçka, i cili merrte ndihmë dhe pagën solidare nga shteti si familje në nevojë është dëshmia ulëritëse.
“Varfëria” e familjes ministrore për shkak të pandemisë dhe gjendjes financiare të “dobët” vazhdoi si për çdo familje të varfër shqiptare.
Mbas kalimit të periudhës disa mujore, por në kohë rekord, befas “varfanjakët” e krizës u bënë me miliona euro dhe ju turrën pasurisë publike.
Kaq mjafton për të arritur në përfundimin se këta janë strategë në hartimin e ligjeve strategjike për vjedhje strategjike e spektakolare.
Pronat e shqiptarëve në duar të pak vetëve.
Janë pronat, që pavarësisht ku ndodhen, në Konispol apo Dukagjin, çdo shqiptar ka pjesë, aq sa mund të jetë hisja, ku 1m katror e diku 50 cm katror.
Kjo është ndarja hipotetike, por të gjithën po e grabit klika qeveritare mavi.
Shqiptar, kjo strategji e dhënies së pronave, nuk është 40 vjeçare, as 99 vjeçare, jo vëllezër, ata, me ligj, po rrëmbejnë prona të trashëgueshme.
Kjo duhet kuptuar… kjo !
