Këta erdhën pa votime dhe mendojnë se gara, konkurrenca dhe vlera nuk ka vlerë…
Këto ditë po flitet e diskutohet nga shumëkush për reformën territoriale dhe hartën e re të pushtetit vendor.
E domosdoshme sigurisht, pushteti vendor nuk është më i popullit, por është shndërruar në një kërbaç mbi kryet e tyre.
Në këtë diskutim janë përfshirë ata që e kanë detyrë kushtetuese, opinionistë, ekspertë të fushës, qytetarë që i njohin konceptet e administrimit, por edhe ata që janë objekt i peshës së këtij pushteti.
Janë një sërë argumentesh që duhet të trajtohen si lidhja organike territoriale, historike, etnografike, largësia e zonave, resurset, infrastruktura, ndërveprimi etj…
Mendoj se veç këtyre dhe para këtyre, deputetët duhet të ndalin në disa çështje të rëndësishme dhe s’duhet të presin mbylljen “me nder” të mandatit të këtyre Bosëve lokal.
Diskutimet duhet të përfshijnë një sërë temash si:
Misteret në menaxhimin e fondeve publike, granteve, përzgjedhja selektive e enteve që “fitojnë” tenderat, administrimi i pronave publike, shitja apo dhënia e tyre me qera shekullore.
Destinacionet dhe dobia e milionave të groposura në kalldrëme e tubacione.
Ligji për Qeverisjen Vendore, aktet shpjeguese apo plotësuese të Këshillit të Ministrave, Ministrisë së Brendshme, Ligji për Administrimin e Territorit, Ligji për Buxhetin e Shtetit, udhëzime të Ministrisë së Financave etj, përcaktojnë qartësisht mënyrën e funksionimit….
Dhe “de jure” administrata i qep letrat konform ligjeve të cituara, por “de fakto”… faktet janë aty, jo në procesverbale, por te objektet e investuara, te pronat e tjetërsuara, te subjektet e favorizuara, te pazaret e prishura…ku rrjedh jo pak Gjanicë apo Lanë të zezë
Qyteti, fshati i di, konkurrentët që futen në gara “elektronike” e dinë, dy javë para, fituesin e veprës në shërbim të komunitetit.
Po auditet, po bilbilfryrësit e virtytshëm, po kontrollet financiare, po raportimet zyrtare për shpenzimet vjetore në këshillat bashkiake ?
Sa për ilustrim, i referohem një akti të Kontrollit të Lartë të Shtetit, që para pak ditësh, rekomandonte masa administrative për gati 70 nëpunës në Bashkinë Fier.
70 nëpunës “fuqiplotë e kokëshkretë”, që s’pyesnin as për ligj e as për epror… E çuditshme kjo pavarësi dhe guxim te këta nëpunës civil.
Pyetja është e thjeshtë: Po eprorët direkt, po të zgjedhurit në krye të këtyre bashkive, a kanë dijeni për shkeljet financiare, për abuzimet me detyrën ?
Dhe janë miliona lekë dëm financiar për çdo vit, simbas raporteve që Kontrolli i Lartë i Shtetit paraqet në Parlament.
Sigurisht këto fonde nuk i përpijnë nëpunësit e vegjël të bashkive apo njësive administrative.
Pushteti Vendor është në sy të të gjithëve, por jo të gjithë e dimë se çfarë ndodh realisht.
Ndonjëherë i gëzohemi asfaltit të zi, vetëm pse ajo rrugë ishte me gropa më parë dhe pa e ditur sesa “Zi” është në shtresat e tij.
E sa të tjera që mund të shtoi e shënoi çdo qytetar…
