Shefqet Meko/Ne shqiptarët jemi të mirë…

“Ne shqiptarët jemi të mirë, jemi njerëz të mirë”, kjo shprehje e thënë nga përbrenda botës së Dr. Elez Biberaj më ka ngelur në mendje gjatë vizitës që i kushtova në Uashington DC  këtij shqiptaro-amerikani të kontributeve dhe vlerave.
Ai na priti aq bujarishëm në zyrën e vet të punës.
Unë bashkë me Dr. Sabah Senën, që kishte ardhur nga Shqipëria për një panair ndërkombëtar, dëshmonin mrekullinë e traditës shqiptare shpalosur në zemer të Kryeqytetit të Botës.
Elez Biberaj, ishte me ne sikur të ishte dekada miku dhe shoku ynë. Aq thjesht, aq njerëzisht, aq çiltër. Ai ishte po ai qe kisha takuar po tek ajo zyrë 7 vjet më parë.
Këtë radhë thekshëm u shpreh: “Po, ne shqiptarët jemi njerëz të mirë…”
Unë dhe Sabah Sena prekëm diçka nga kjo e mirë që thuhej.
Nga ky moment vendosa te fokusohem tek të mirat tona. Këto edhe na gjallërojnë edhe na freskojnë.
Këto të mira nuk na lënë të ndihemi poshtë apo të poshtëruar.
Le të marrim seriozisht atë që na thoshte në zyrat e Zërit të Amerikës, drejtor Biberaj:”Ne shqiptarët jemi njerëz të mirë”… Le të  lavdrojmë të mirën tonë, të mirën shqiptare.