Kreu demokrat, Sali Berisha, tha sot në konferencën javore me mediat, se më 7 korrik do të protestohet jo vetëm kundër krizës së rëndë ekonomike dhe projektit Ballkani i Hapur, por edhe kundër George Soros.
Janë njëmijë arsye që shqiptarët të protestojnë tha Berisha, duke rreshtuar që nga varfëria, korrupsioni, çmimet e larta, pagat e fiksuara që nga viti 2013, politikat diskriminuese ndaj fermerëve dhe shtresave në nevojë etj.
Duke ndalur posaçërisht te protesta e thirrur më dt 7 korrik, ora 19:00, ai u shpreh:
Ideja ime është një front opozitar, me një udhëheqje kolektive, ku rol kryesor ka PD. Kontributi i çdo force politike, apo faktori tjetër, organizata të shoqërisë civile, individ i shquar është i mirëpritur. Ne jemi të hapur. Rama duhet të përballet me frontin për shpëtimin e Shqipërisë”.
Në fjalën e tij, ai ndali posaçërisht edhe te aktiviteti i Soros.
“E konsideroj atë një armik të stabilitetit dhe të demokracisë në Shqipëri. Me mbështetjen e projekteve në sinkron me Lavrovin dhe Putin, Soros fakton se është një faktor i rrezikshëm për paqen në Ballkan,” tha Berisha.
Ndërsa për bashkëpunimin me faktorë të tjerë opozitar si dhe LSI e Ilir Metën, Berisha u shpreh:
“Disa herë jemi takuar në Baku me presidentin Meta. Ai i mbyll këtë javë detyrimet. Mirëpritet kontributi i tij dhe i LSI-së në opozitarizmin kundër Edi Ramës. Do bashkohemi me të gjitha forcat politike që besoj se ky regjim është armiqësor ndaj shqiptarëve”.
