Jo më larg se më 19 maj 2022, kryeministri Edi Rama, i dehur nga mbështetja që iu dha si prej 6 vjetësh Shqipërisë nga Parlamenti Europian, nëpërmjet një rezolute të re, përsëriti pa pikë turpi përrallën “Shqipëria, histori suksesi”!!! Natyrisht, atij ia do posti dhe interesi i disaanshëm të sajojë, gjejë dhe shikojë “suksese” edhe aty ku nuk janë të vërtetë dhe të përjetueshëm nga shumica e qytetarëve. Por, nëse futet në mesin e rreth 2 milionë qytetarëve dhe fshatarëve të thjeshtë, që mbijetojnë me paga, pensione, mbështetje sociale allashqiptare apo në papunësi e varfëri të tejzgjatur, deri të përjetshme, duhet të ndjenjë në mos keqardhje për ata, vrasje në ndërgjegje dhe turpërim para tyre. Një pjesë e tyre lindin, martohen dhe vdesin të papunë apo në rradhët e ushtrisë së mjeranëve, lypsave që të zënë rrugët trotuareve apo të zgjasin duar lokaleve, për një lëmoshë, qoftë edhe 10- 20 lekë….Po të kishte ndjeshmëri dhe aftësi reflektimi, deri në njohjen e paaftësisë dhe të turpërimit, mund të kapte, në mos me veshë, krejt pa fjalë, edhe zërat ulëritës: MJAFT MË, o kryeministër! Mos gënje kaq trashë e pashpirtësisht! Shqipëria, nga 29 nëntori 1944 deri sot më 19 maj 2022, e fundit në Europë për treguesit e pagave e të pensioneve, të nivelit të jetesës, zhvillimit, demokratizimit e t’i përrallis se na qenka bërë gjatë afro 9 vjetëve të mbretërimit tënd, “histori suksesi”!!!??? Kullat 30-40 katëshe, komplekset sheikore turistike e tregtare mbi objekte kulture, trashëgimie, identifikimi kombëtar, projektet e “investimeve strategjike”.., në të vërtetë janë dëshmi korrupsioni, trafiqesh, kanabizimi, heroinizimi, oligarkizimi, mafianizimi, ndraghetizimi, lavatriçezimi të miliardave të pista…të Shqipërisë!!! Të lutemi, mos vazhdo të na trajtosh si të verbër e të shurdhët, mos vazhdo më të na e bësh dhe reklamosh ferrin parajsë, varfërinë begati, emigracionin nëpër vendet e Perëndimit turizëm popullor…!!!
