Ish-presidenti Alfred Moisiu shprehet se një president duhet të mendojë për vendin në radhë të parë dhe jo për pasurimin e vetes së tij dhe rrethit të tij, pasi presidenti është figura më e lartë e shtetit.
“Për mendimin tim Kushtetuta që kemi patur ka qenë shumë e mirë , ajo që është miratuar në vitin 98’, mund të kishte nevojë për ndonjë ndërhyrje të vogël sigurisht, por atë e sakatuan çdo vit pak nga pak, edhe në 2008. Tani është bërë kryeministri i paprekshëm. A jemi në demokraci? Mund t’i vesh çdo lloj emri por vetëm demokraci nuk i thua dot. Në këtë rast këto gjera tregojnë, për mendimin tim ka ardhur koha tani, do të bëhen zgjedhjet sepse kanë afatin e tyre dhe sigurisht president duhet zgjedhur, pasi është figura më e lartë e shtetit.
Mua kur ma kanë ngarkuar këtë detyrë, më kujtohet kur u zgjodha, të nesërmen, ende nuk isha zgjedhur por ishte shpallur kandidatura ime dhe u miratua dhe më thotë një gazetar, atëherë nuk kishte edhe shumë televizione, më tha: Zoti Moisiu, si të duket ty kjo, si do e bëni këtë punë?
Dhe unë iu përgjigja: Unë i kam hip dhe i kam zbritur kalit disa herë. Ndërsa ai më tha: I ke hipur dhe zbritur kalit po mirë po president nuk ke qenë ndonjëherë.
President skam qenë por shtetin e njoh, e di se çfarë është shteti, di se çfarë përgjegjësie janë para shtetit dhe para popullit. Pra, në radhë të parë, duhet të kesh ndershmëri, përkushtim dhe vendosmëri. Padyshim kundrejt vendit tënd dhe jo të mendosh për veten tënde e për rrethin tënd, për t’u pasuruar. E kam thënë disa herë që futja në politike, marrja me politikë është mision, është njëlloj si prifti në Mozambik me mision.
Në qoftë se e merr përsipër këtë punë kështu duhet bërë, e kam përsëritur disa herë por prap do e them sepse ka nevojë që disa gjera të thuhen disa herë, sepse nuk kuptohen mirë. Në parathënien e librit tim të tretë, them kështu. Në qoftë se lindësit tanë, shkrinë pasurinë e tyre dhe vunë jetën në rrezik për të bërë Shqipërinë, për fat të keq sot politikanët po e zhbëjnë Shqipërinë për t’u pasuruar. Dhe për këtë më ka marrë një gazetar i njohur dhe më tha: Zoti Moisiu, kjo që po thoni ju është akuzë e rëndë.
Po i thashë, shumë e rëndë është. Dhe më tha: Po fakte a keni për këtë? Përgjigja ime ishte: Fakte ka sa të duash, por unë po të marr vetëm një. Unë në atë shtëpi kam që në vitin 72’, dhe sivjet bëra 50 vjet në atë shtëpi ku jam. Pse nuk doja unë të kisha vila ose pasuri të tilla, doja, por me një rrogë nuk bëhen dot, jo se nuk doja por nuk bëhen dot me një rrogë. A duhet të abuzosh? Po, por unë atë nuk e bëja dot, sepse nuk e mora përsipër atë detyrë për të abuzuar, e mora atë detyrë për t’i shërbyer vendit dhe popullit tim. Edhe kur njeriu merr një vendim duhet ta zbatojë dhe ta çojë deri në fund. Sigurisht që unë them se në radhë të parë dhe meqë jemi në periudhën që duhet zgjedhur, jo se ska njerëz ky vend, ky vend ka njerëz por duhet t’i zgjedhim njerëzit. Duhet t’i zgjedhim njerëz të tillë që vërtet të mendojnë jo për vete, por të mendojnë për vendin” u shpreh ish-presidenti Moisiu.
