Sot, më datë 16.05.2025, u zhvillua mbledhja e Kryesisë së Partisë Lëvizja e Legalitetit.
Pas diskutimeve dhe analizës së situatës politike në vend, ku një qeverisje autoritare dhe e korruptuar po thellon krizën ekonomike, politike dhe përfaqësimin opozitar, Kryesia e PLL vlerësoi si të domosdoshëm intensifikimin e punës politike dhe organizative të partisë për të mbushur vakumin e krijuar në të djathtën opozitare, si dhe për të forcuar pozicionimin tonë në aksionin politik opozitar.
Në përfundim të mbledhjes, u miratuan disa vendime dhe udhëzime për ecurinë e punës deri në mbledhjen e ardhshme, ndër të cilat:
1. Diskutimi dhe përcaktimi i qëndrimit të PLL në lidhje me reformën zgjedhore, reformën territoriale, si dhe raportin me aksionin politik opozitar.
2. Udhëzim për degët e PLL për ridimensionimin dhe riorganizimin e strukturave, si dhe nisjen e përgatitjeve paraprake për zgjedhjet lokale.
3. Vijimi i punës për zhvillimin e konferencave zgjedhore në degët ku ky proces ende nuk ka përfunduar.
4. Miratimi i propozimit për Këshillin Kombëtar lidhur me mënyrën e pjesëmarrjes së PLL në zgjedhjet lokale të vitit 2027.
5. Vendim për rritjen e seriozitetit dhe angazhimit të çdo dege në pasqyrimin dhe promovimin mediatik të aktiviteteve politike të partisë.
6. Caktimi i koordinatorëve për çdo qark, të cilët do të monitorojnë dhe koordinojnë punën përgatitore për zgjedhjet lokale të pranverës 2027.
Partia Lëvizja e Legalitetit mbetet e angazhuar për forcimin e opozitarizmit të djathtë dhe përfaqësimin dinjitoz të qytetarëve shqiptarë.
