Taulant Balla është shprehur sot në Komisionin Parlamentar:
Të kufizohet shpejtësia në 3 vitet e para për shoferët e rinj, të lejohet shpejtësia mbi 90 km në orë, të jetë 110 deri 130 km atje ku rrugët lejojnë dhe leja e drejtimit të jetë për 15 vite…
Sot, në Komisionin për Veprimtarinë Prodhuese, Tregtinë dhe Mjedisin, Kreu i grupit parlamentar të Partisë Socialiste, Taulant Balla, ka propozuar disa ndryshime të Kodit Rrugor.
Ai tha se një nga propozimet ishte limitimi i shpejtësisë për drejtuesit e rinj, deri në 3 vitet e para. Sipas Ballës limtimi i shpejtësisë për drejtuesit e rinj është një masë për uljen e numrit të aksidenteve.
Ai tha se drejtuesit e rinj, deri në tre vite nga marrja e patentës nuk do mund të qarkullojnë në autostrada me më shumë se 80 km/h.
Gjithashtu ai propozoi që të gjithë drejtuesit e automjeteve deri në 70 vjeç që duan të pajisen me një leje të re drejtimi apo duan të rinovojnë lejen ekzistuese do të ta marrin atë me një afat vlefshmërie 15-vjeçar.
“Unë e di që shumë të rinj e të reja kur ta dëgjojnë këtë diskutim do thonë po na vejnë edhe një kufizim tjetër. Patjetër që do ju vendosim një kufizim sepse këto shifrat këtu janë të rënda. Shifrat e aksidenteve rrugore tek moshat e reja janë të rënda dhe ne po vendosim një kufizim që nuk e kemi marrë nga Hëna, por nga vendi tjetër, vetëm një det na ndan, nga Italia që në kushtet e rritjes së aksidenteve tek të rinjtë kanë vendosur këtë kufizim. Të mësohen me rrugën, të mësohen me autostradën, me superstradën. Respektimi i këtyre kufizimeve i bën mirë shoqërisë sonë sepse sa më pak aksidente aq më mirë është. Këto ndryshime i shërbejnë vetëm qytetarëve të thjeshtë të këtij vendi. I shërbejnë çdo familje shqiptare që pas këtyre ndryshimeve do të jetë më e sigurt që djali apo vajza e tyre i ri kanë disa kufizime që nuk e tejkalojnë shpejtësinë dhe nuk kthehen në burim aksidenti”-tha kreu i grupit socialist, Balla
