Të nderuar qytetarë,
Zonja dhe zotërinj, miq të nderuar,
Kam kënaqësinë dhe nderin e veçantë që, në emër të Partisë Lëvizja e Legalitetit, t’ju drejtohem në këtë prag të heshtjes zgjedhore – gati për të hapur së bashku një kapitull të ri: për fëmijët tanë, për familjet tona, për një shoqëri më të drejtë dhe për Shqipërinë që duam.
Gjatë kësaj fushate kemi pasur mundësinë të takojmë mijëra prej jush. Kemi dëgjuar shqetësimet tuaja, kemi parë nga afër realitetin dhe kemi ndjerë revoltën ndaj një qeverie që mbështetet në propagandë dhe është krejtësisht e shkëputur nga interesat qytetare.
Pamë shkolla bosh e kulla të zbrazura, të moshuar të vetmuar në vështirësi, punonjës të ndershëm të administratës që heshtin nga frika, por që shpresojnë për ndryshim.
Më 11 maj, keni në dorë të bëni një zgjedhje historike:
Mes propagandës dhe programit tonë.
Partia Lëvizja e Legalitetit,
– Edhe pse e përgatitur dhe e gatshme për të garuar e vetme në këto zgjedhje,
– Edhe pse e ftuar nga pothuajse të gjitha subjektet politike për t’u bashkuar me to, faleminderit për vlerësimin,
– Duke pasur parasysh potencialin tonë dhe çka përfaqësojmë në politikën shqiptare,
– Dhe përballë një kodi zgjedhor thellësisht antidemokratik dhe antipluralist,
vendosi me bindje të plotë t’i bashkohet koalicionit “Aleanca për Shqipërinë Madhështore (ASHM)”, si mundësia e vetme për të larguar këtë mazhorancë të dështuar.
Ky koalicion është forca e vetme reale që mund ta ndalë këtë keqqeverisje.
Çdo shpërndarje vote tek subjekte të tjera politike dëmton këtë mision të përbashkët.
Legalistët e dinë mirë rrugën – si gjithmonë. Vota jonë shkon për siglën PLL, brenda numrit 1 të koalicionit ASHM. Kjo është përgjigjja jonë ndaj kujtdo që mundohet të përfitojë në mënyrë të padrejtë.
Më 11 maj 2025, ju ftoj të gjithëve:
Të dalim në votime të qetë, me vetëdije të plotë, pa asnjë ekuivok.
Të bashkohemi!
Të lëmë pas çdo rezervë, çdo ndasi, çdo inat mes nesh. Të jemi bashkë për një qëllim të vetëm:
Të ndryshojmë Shqipërinë!
Të votojmë të gjithë vetëm për Numrin 1 – Aleancën për Shqipërinë Madhështore.
Asnjë subjekt tjetër.
Në çdo qark të mbështesim kandidatët me integritet, me rrënjë të djathta, nga familje patriote e nacionaliste, ish-të burgosur dhe të internuar politikë – përfaqësuesit e vërtetë të konservatorizmit shqiptar.
Konkretisht, për qarqet ku Partia Lëvizja e Legalitetit ka kandidatë të votohen:
•Tiranë: z. Petrit Doda
•Shkodër: z. Ted Kopliku
•Durrës: z. Aulon Kalaja
•Dibër: znj. Alketa Agolli
•Fier: z. Ajet Gurguri
•Dibër: z. Ismail Uku
Zoti e bekoftë Shqipërinë dhe shqiptarët!
Fitore!
