Kryeministrja e Francës, Elisabeth Borne, i mbijetoi mocionit të mosbesimit në Parlament, mocion i kërkuar nga opozita e krahut të majtë dhe testuar sot, shkruan timesnownews.com
Mocioni – për të cilin kërkoheshin 289 vota për të kaluar,u mbështet nga 146 deputetë në Parlamentin Kombëtar. Votimi pasoi një debat prej tre orësh.
Partia Franca e papërkulur (LFI) e ngriti mocionin kundër Borne, e cila udhëheq Qeverinë e pakicës. Por, kryeministrja nuk ishte në rrezik pasi partitë e tjera opozitare deklaruan para votimit se nuk do ta mbështesnin mocionin.
Gjatë debatit, kryeministrja franceze akuzoi partinë LFI se po humb kohën parlamentare për tema më të rëndësishme
“Zonja dhe zotërinj, sot ne do të mund të punonim për të mirë e popullit francez. Por, në vend të kësaj ne po debatojmë për mocionin e mosbesimit, që bazohet në synimet e mia të pretenduara dhe që po pengon punën e Parlamentit, njëherësh edhe dëshirën e popullit franceze”, tha Borne para votimit.
Borne, 61 vjeçe, e ka bërë të qartë se planifikon që të varet nga votat e partive opozitare për të kaluar ligjet që do të sjellë në Parlament, teksa partia Republikane e krahut të djathtë po shihet si subjekti kyç për të ardhmen e saj.
Mbështetja e 62 deputetëve të Republikanëve do të ishte e mjaftueshme që Qeveria të mund të kalonte të gjitha ligjet në Parlamentin francez.
