Shoku ministër, në një shkollë të Librazhdit dje ka ndodhur një tjetër plagosje. Një djalë, në klasë të 11-të është sulmuar në grup dhe është goditur me kaçavidë në kokë. Ka përfunduar në spital me 7 qepje. Emrin e shkollës po e ruaj të ma thotë Policia e Elbasanit në ditët në vijim. Zënka-sherr, sipas informacioneve të mia ka nisur që me datë 7, sigurisht që në dijeni kanë qenë edhe mësues. Sod ka pas edhe një takim në bashki për atë çështje, aty veç prindërve të fëmijëve ka qenë edhe shefi i komisariatit, sërish asnjë za nuk ka dalë nga policia e Shtetit. Mbase Drejtori i Policisë i ardhun nga Elbasani, e ka këtë shkollën në zonën e influencës së shokëve të vet…
Sigurisht, adoleshentët dhe fëmijët është vështirë të mbahen nën kontroll, por minimumi që mund të bahet në këtë vend është tu jepet za rasteve dhe mos të na ndodhi ngjarje që shkul zemra si ajo e Martinit. Sod u nxituet fort e nxorët një paçavure akt-ekspertimi. E kuptoj; jeni në hall por nuk duhet të luhet me gjak fëmijësh. Po ashtu dole menjëherë e the se u zbardh ngjarja e Cakranit, ku nji nxanës sulmoi me thikë shokun e klasës. Nuk asht meritë zbardhja e asaj ngjarjeje, shoku Ministër. Për fat djali asht gjallë dhe mundi me tregue të vërtetën, po për ato ngjarje që kërkush nuk flet, si i bahet?
Ta vazhdojmë ‘helmimin’ meqë shoku ministër edhe mund të kërcënosh në grup gazetarë nga zyra për të cilën të paguajmë që të marrësh masa për të sigurue jetën e qytetarëve të këtij vendi, sidomos të fëmijëve kur janë në shkolla. Para pak minutash erdhi një informacion nga Peqini: Nji djalë, i sëmurë mendërisht (gjithnjë sipas policisë tënde) kishte 6 ditë i humbur dhe u gjend sot; Për çfarë shërben policia në këtë vend, se ti deri dje ishe polic? Apo po e ‘helmojmë’ pak tepër opinionin?
Shoku ministër, kthehu të policimi, se nuk di të lexosh as deklaratat që t`i thonë, sepse besoj se as ti vetë nuk i beson! Kishe thanë në Korçë se kishit shoqëruar të përfshirët në masakrën gjaksore të Dobraçit: shoku ministër, vrasësit nuk shoqërohen, arrestohen, kaq shpejt harrove…?
