Titulli dhe shkrimi i mëposhtëm është postuar në faqen zyrtare të Ambasadës Shqiptare në Athinë Greqi:
✍️𝙃𝙞𝙨𝙩𝙤𝙧𝙞 𝙎𝙪𝙠𝙨𝙚𝙨𝙞 – 𝙍𝙤𝙗𝙚𝙧𝙩 𝙂𝙤𝙧𝙤
E ka filluar punën si gazetar në 1985, në revistën satiro-humoristike “Hosteni”. Në 1992 kaloi në gazetën e pavarur “Tirana” dhe një vit më vonë u vendos në Athinë, pas emërimit si korrespondent i seksionit shqiptar të radios britanike BBC, ku kontribuoi për gati dy dekada, deri në mbylljen e seksionit, në 2011. Gjatë gjithë viteve 1990 ishte i vetmi gazetar shqiptar i akredituar në Greqi; ky pozicion i dha privilegjin që të ishte përcjellësi dhe analisti i vetëm i zhvillimeve tepër të rëndësishme – në atë periudhë – në marrëdhëniet midis Shqipërisë dhe Greqisë. Por edhe nëpërmjet reportazheve dhe intervistave me njerëzit e thjeshtë, të shndërrohej dhe në zërin e vetëm të mijëra emigrantëve shqiptarë kur ata ishin të palegalizuar; si dhe në orientuesin e tyre në rrugën e vështirë gjatë fazës së parë të legalizimit, në vitet 1998-2001.
Në 1999 ai ribotoi dhe drejtoi Gazetën e Athinës, të vetmin periodik në gjuhën shqipe në Greqi, deri në fillim të 2004-s, kur themeloi me bashkëshorten Diana, gazetën Tribuna. Tribuna, e cila qarkulloi në formatin e printuar deri në fund të marsit 2015, mblodhi rreth vetes emrat më të shquar në fusha të ndryshme të komunitetit shqiptar në Greqi, por edhe disa prej analistëve më të njohur të hapësirës shqiptare, si dhe kishte korrespondentët e vet në Prishtinë, Tetovë, Londër dhe Nju Jork. Në fillim të 2018-s, bashkë me gazetaren shqiptare që jeton në Greqi, Juli Ndriko, i dhanë emrit Tribuna një tjetër shtysë cilësore, duke krijuar “Web Tv Tribuna”. Nëpër vite Robert Goro ka punuar si korrespondent edhe për organe të rëndësishme të shtypit mbarëshqiptar, si “Koha Jonë”, “Koha e Zëri” në Prishtinë, “Lobi” në Shkup, “Agjencia Telegrafike Shqiptare”. Prej 2011-2020, punoi gjithashtu si korrespondent i televizioneve “ABC News”, “Ora News” dhe “Tv Klan”. Një ndër dokumentarët më të njohur është “Dosja G.”, me tematikën e marrëdhënieve shqitaro-greke dhe të komunitetit shqiptar në Greqi. Në vitin 2020, Unioni i gazetarëve Shqiptarë e nderoi me çmimin e karrierës, me motivacionin “𝗚𝗮𝘇𝗲𝘁𝗮𝗿 𝗺𝗲 𝗻𝗷𝗲̈ 𝗸𝗼𝗻𝘁𝗿𝗶𝗯𝘂𝘁 𝘁𝗲̈ 𝗿𝗲̈𝗻𝗱𝗲̈𝘀𝗶𝘀𝗵𝗲̈𝗺 𝗻𝗲̈ 𝗴𝗮𝘇𝗲𝘁𝗮𝗿𝗶𝗻𝗲̈ 𝘀𝗵𝗾𝗶𝗽𝘁𝗮𝗿𝗲 𝘁𝗲̈ 𝘁𝗿𝗶 𝗱𝗲𝗸𝗮𝗱𝗮𝘃𝗲 𝘁𝗲̈ 𝗳𝘂𝗻𝗱𝗶𝘁”.
Me punën dhe këmbënguljen e vet përgjatë karrierës në shumicën e mediave kombëtare shqiptare, ka mishëruar vlerat e reporterit profesionist, objektiv dhe me reputacion. Gjatë dekadave të fundit ka krijuar dhe inkurajuar si askush tjetër mediat shqiptare në emigracion dhe ka shkruar historinë e vet të suksesit në mediat ndërkombëtare në gjuhën shqipe. Pjesë e punës së tij të frytshme janë botimet e shumta publicistike dhe kryesisht analiza me ndikim opinionbërës për marrëdhëniet ndërfqinjësore në rajonin e Ballkanit.
