Kryebashkiaku i Rrogozhinës, Edison Memolla është marrë i pandehur nga SPAK nën akuzë për korrupsion në zgjedhjet e pjesshme të 6 marsit 2022.
Memolla është shfaqur mesditën e sotme nën shoqërinë e avokatit të tij në Prokurorinë e Posaçme, ku mësohet se i është komunikuar akuza.
Hetimi për të ka nisur muaj me parë pas denoncimeve se Memolla paguante faturat e energjisë elektrike të qytetarëve të Rrogozhinës në këmbim të votave.
Në media, është publikuar një audio-përgjim që implikon Memollën. Regjistrimi i bisedës telefonike raportohet se është bërë në prag të zgjedhjeve të pjesshme të 6 marsit 2022. Memolla është kapur në një audio-përgjim, duke ndërhyrë tek OSHEE për të mos i ndërprerë energjinë elektrike një familjeje të varfër.
Në një bisedë telefonike me një grua, Memolla konfirmon se ishte takuar më herët me telefonuesen, të cilës i kishte garantuar mos-ndërprerjen e energjisë, në këmbim të votës për zgjedhjet e 6 marsit. E më pas në telefon del elektricisti që kishte shkuar për ndërprerjen e energjisë, të cilit Memolla i kërkon që të mos ia ndërpresë energjinë.
Memolla e orienton elektricistin që pasi të kalojnë zgjedhjet mund të vepronin. Në një moment, mendohet se kryebashkiaku i referohet kryeministrit Edi Rama teksa i thotë elektricistit të OSHEE-së: “Të flas me Edin unë, të flasi me ato të mëdhenjtë që të mos ju bezdisin”.
Të gjitha këto prova të hetuara nga SPAK kanë renduar pozitën e kryebashkiakut te cilit i është komunikuar këtë te enjte edhe akuzua e korrupsionit në zgjedhje.
Në prill të këtij viti, ai është paraqitur në SPAK mbi dyshimet se ka bërë punësime fiktive në bashki.
