Drejtori i Përgjithshëm i Policisë së Shtetit, Muhamet Rrumbullaku ka dalë sot në një konferencë për mediat, ku ka dhënë detaje rreth megaoperacionit policor ‘Flakë në det’.
Sipas Rrumbullakut, gjithçka nisi pas zbulimit të një rrjeti të trafikut të drogës në Patok, ku u pikasën dy mjete lundruese që shkëmbenin ‘mallin’.
Shtetasit që ndodheshin në velierë, i kanë vënë zjarrin mjetit lundrues, ndërsa personat që ndodheshin në bord, janë arrestuar.
“Operacioni i koduar ‘Flakë në det’, u organizua dhe finalizua në bazë të inteligjencës policore, në bashkëpunim me policinë italiane.
Ky operacion filloi pas njoftimit për lëvizjen e një mjeti lundrues nga Laguna Patoku në jug-perëndim. Ky mjet ka kontaktuar në det një tjetër mjet, dhe dy personat në dy mjete kanë shkëmbyer lëndë narkotike.
Shtetasit në velierë kur kanë konstatuar policinë, i kanë vënë zjarrin mjetit ujor dhe kanë tentuar të largohen me një barkë, por janë kapur në flagrancë.
Të arrestuarit janë 4 shqiptarë dhe 2 ukrainas.
U sekuestrua 23 kg drogë”, tha ai.
