Vetëm në tri ditët e para të kësaj jave, në Itali kanë arritur 8.500 migrantë
Kryeministria e Italisë, Giorgia Meloni, paralajmëroi se “e ardhmja e Evropës është në rrezik” pasi një mori migrantësh zbarkuan në ishullin Lampedusa në Detin Mesdhe.
Mijëra migrantë nga brigjet e Afrikës së Veriut zbarkuan në ishullin në jug të Italisë gjatë kësaj jave, duke nxitur një krizë që ka rindezur debatin lidhur me ndarjen e përgjegjësisë në mesin e shteteve të Bashkimit Evropian.
Gjatë një konference për media në këtë ishull së bashku me presidenten e Komisionit Evropian, Ursula von der Leyen, kryeministrja Meloni tha se blloku duhet të punojë së bashku për t’u përballur me sfidat që sjell migrimi i pakontrolluar.
“E ardhmja e Evropës është në rrezik sepse e ardhmja e Evropës varet nga kapaciteti i Evropës për t’u përballur me sfida të mëdha”, tha Meloni.
Vetëm nga e hëna deri të mërkurën, afër 8.500 persona – më shumë se popullsia e tërësishme lokale e ishullit – arritën me 199 anije, ka thënë agjencia për migrim e Kombeve të Bashkuara.
“Migrimi i parregullt është një sfidë evropiane që kërkon përgjigje evropiane”, tha von der Leyen, duke u bërë thirrje anëtarëve të bllokut që të marrin disa migrantë.
Kryqi i Kuq italian, që menaxhon qendrën e stërmbushur të migrantëve në Lampedusa, tha të dielën se 1.500 migrantë gjenden në qendër, pavarësisht se ajo ka kapacitet për të pranuar vetëm 400.
Transferimi i migrantëve në Sicili dhe pjesë të tjera të Italisë nuk ka bërë ndryshimin pasi migrantët po vazhdojnë të zbarkojnë në Lampedusa, tha Kryqi i Kuq, duke shtuar se transferime të tjera pritet të bëhen më vonë gjatë 17 shtatorit.
Anijet e shpëtimit që operohen nga organizata sikurse Mjekët pa Kufi kanë shpëtuar pothuajse 500 migrantë përgjatë 11 operacioneve. Por, dhjetëra anije të vogla vazhdojnë të kalojnë për në Lampedusa, ku sistemi për menaxhimin e migrantëve është buzë kolapsit.
Vetëm gjatë këtij viti, mbi 127.000 migrantë kanë arritur në brigjet italiane, apo dyfish më shumë sesa në periudhën e njëjtë të vitit të kaluar.
Mbi 2.000 persona kanë vdekur gjatë këtij viti gjatë kalimit nga Afrika e Veriut për në Itali dhe Maltë, ka thënë agjencia për migrim e OKB-së.
BE-ja po punon që të ndryshojë rregullat se si duhet të menaxhohet ardhja e migrantëve.
Në Francë, anëtarët e të djathtës ekstreme kanë argumentuar se Parisi nuk duhet të lejojë që ndonjë migrantë nga Lampedusa të kalojë kufirin nga Italia.
Megjithatë, burimet e AFP-së brenda Qeverisë franceze kanë thënë se Meloni dhe presidenti francez, Emmanuel Macron, kanë biseduar dhe janë pajtuar për nevojën “e forcimit të bashkëpunimit në nivel evropian”.
Nga Radio Evropa e Lirë
