Më 1880, Lord George J. Goschen (1831-1907) ishte ambasadori i jashtëzakonshëm i Britanisë së Madhe në Portën e Lartë në Stamboll.
Në letrën e datës 26 korrik të vitit 1880, që Goschen iu drejtua Lordëve Granville dhe Fitzmaurice, parashtrohej domosdoshmëria e angazhimit të fuqive të mëdha të asaj kohe, në realizimin e një projekti të vjetër dhe të njohur evropian për ruajtjen e racës dhe krijimit të një shteti të pavarur shqiptar në Ballkan.
Mbi këtë projekt dhe dokument historik shumë të rëndësishëm bazohen të gjitha memorandumet për pavarësinë e Shqipërisë, përfshirë edhe memorandumin e vitit 1903 që Ismail Qemal Bej Vlora i kishte dërguar Sulltanit dhe fuqive të mëdha të kohës.
Në letrën e Lordit Goschen, para së gjithash argumentohej padrejtësia e vendimeve të Traktatit të Berlinit (1876) ndaj popullsisë dhe territoreve shqiptare që ishin ende të pushtuara dhe të hedhura në tregun e shpërblimeve dhe dëmshpërblimeve që kishte ndërmarrë perandoria pushtuese, kur. po përjetonte fundin e një sundimi të tmerrshëm 500-vjeçar në Shqipëri dhe në Ballkan. Mbi këtë dokument u argumentua sërish fakti se krijimi, konsolidimi dhe ruajtja e një shteti të qëndrueshëm shqiptar, ka qenë, është dhe do të mbetet një nga projektet më të rëndësishme politike në Evropë.
Në këtë letër, Lordi Goschen shkruante: “Kjo racë e lashtë dhe e dalluar ka parë se kombësia e racave të tjera fqinje po përfiton nga mbrojtja e fuqive të ndryshme evropiane dhe se synimet e tyre janë realizuar me një ekzistencë të pavarur.
Ajo ka parë që bullgarët janë emancipuar plotësisht në Bullgari dhe pjesërisht në Rumelinë Lindore.
Ajo ka parë se dëshira e flaktë e Evropës është të çlirojë nga zgjedha turke territorin e banuar nga grekët.
Ajo ka parë se sllavët në Mal të Zi mbrohen me këmbëngulje dhe entuziazëm nga perandoria e madhe sllave veriore.
Ajo ka parë se çështja e Lindjes zgjidhet sipas parimit të kombësisë dhe se Gadishulli Ballkanik gradualisht po ndahet në raca të ndryshme sipas të njëjtit parim.
Ndërkohë shqiptarët e kanë parë që nuk trajtohen njësoj. Kombësia e saj nuk po njihet dhe territori i banuar nga shqiptarët ndodhet në anën veriore në dispozicion të malazezëve të mbështetur nga Rusia, ndërsa në jug në dispozicion të grekëve të mbështetur nga Franca”
