Të marrët ecin para drejt greminës, ndërsa njerëzit normal, para vdekjes zgjedhin një hap mbrapa.
Ky hap nuk do na largojë me magji nga rrokullima. Ama i japim vetes një mundësi për të ndryshuar. Nëse ecim para kur jemi para honit të hapur, vdekja na pret.
Nesër është ditë reflektimesh. Mos mendoni me emocione po me mendje, duke parë të vërtetën dhe realitetin në sy.
Po na vjedhin, po na shpopullojnë, po na kthejnë në një diktaturë të frikshme, ku ligji dhe demokracia janë inekzistente.
Edhe uji po ndejti qelbet, sa mund të jenë qelbur këta me gjithë këto vite në pushtet??
Të gjithë ndihemi në dilemë, të pakënaqur e me shumë dyshime për gabimet e bëra. Por, ka një moment që duhet të zgjedhim mes vdekjes së dinjitetit, shpresës dhe demokracisë ose të bëjmë një hap mbrapa dhe të përpiqemi të shpëtojmë.
Të gjithë jemi të lodhur nga zgjedhja e së keqes më të vogël, por më mirë një e tillë se një katastrofë.
Vota e së dielës është pro luftës për ta bërë këtë vend, për të qëndruar në këtë vend, ose ta shpiem drejt vdekjes së sigurt.
Nuk flitet më nëse na pëlqen apo jo ky apo ai emër lideri, por për tu bashkuar kundra instalimit të një diktature të frikshme.
Mos e shisni votën dhe dinjitetin, për një thes miell apo për tallava.
Kur të jeni para kutisë së votimit mendoni se; sa njerëz janë detyruar të lënë vendin, se është kthyer në band dhe i pajetueshëm, sa nga pasuritë tona publike janë shitur e shkatërruar, që nga Porti Durrësit, që është luftuar në shekuj për të, te shkatërrimi i trashëgimisë kulturore e deri te investitorët strategjikë.
Mendoni që mos t’i jepni askujt më, mundësinë e të qenit diktator, që të fyej , të grabisë e të tallet duke iu kthyer në lolo.
Tirana ka gjashtë kandidatura, keni mundësinë të zgjidhni ata që nuk janë provuar.
Sepse ka një çast, që njeriu ndal, se hapi para mund të jetë fatal. Mendojini këto kur të votoni…
P.s. Dhe dilni të gjithë të votoni, duhet të imponojmë votën tonë, nuk mund të zgjidhen më me 15% të votuesve dhe t’i imponohen 85% – it tjetër. Vota është përgjegjësi. Votoni…
