Si sot 76 vite më parë, Italia u shpall Republikë Parlamentare. Më 2 Qershor 1946, u krye tranformimi nga monarkia në republikën e sotme. Ky proçes u ndikua nga rezultati i një referendumi, në të cilin morën pjesë 89 për qind e italianëve, duke përfshirë edhe gratë për herë të parë.
Marrëdhëniet shqiptaro-italiane, kanë rrënjë të hershme duke datuar që në mesjetë. Komuniteti Shqiptar Arbëreshë, sot është pjesë integrale e shoqërisë italiane. Një komunitet me vlera të paçmueshme të cilat i ruan dhe sot e kësaj dite.
Në kohën kur Shqipëria vuante izolimin e plotë nga diktatura totalitariste, falë valëve televizive dhe radiofonike, Italia, qëndronte si një dritare për të parë botën perëndimore. Me shëmbjen e diktaturës, Italia u bë porta pritëse për shumë shqiptarë që zgjodhën emigrimin. Pavarësisht vështirësive të shumta, shqiptarët sot në Itali, janë element ndikues të integruar në shoqëri, kontribues ekonomikë dhe shërbejnë si urë lidhëse midis dy vendeve.
Duke pasur parasysh rastin italian, shprehim dhe njëherë rolin e referendumeve si një domosdoshmëri në demokratizimin social dhe politik të një vendi. Si një mënyrë për të na çuar më pranë drejt familjes së madhe evropiane.
Sot Shqipëria ka marrëdhënie të ngushta bilaterale me Italinë, si partnerë të rëndësishëm gjeostrategjikë në funksionin e integrimit të Shqipërisë në BE.
