Ish-ministri i Mbrojtjes dhe aktualisht deputet, Fatmir Mediu, është shprehur për mediat pas daljes nga SPAK, ku u njoh zyrtarisht me akuzën e shpërdorimit të detyrës lidhur me tragjedinë e Gërdecit.
Ai ka deklaruar se është i pafajshëm dhe se i është prezantuar nga Prokuroria e Posaçme i njëjti fashikull si në vitin 2009 pa shtuar asnjë dokument apo provë shtesë.
Mediu u shpreh se akuza ndaj tij është e motivuar politikisht.
“Dua t’ju bëj me dije që më është prezantuar i njëjti fashikull, e njëjta akuzë si në 2009, pa shtuar asnjë dokument dhe as provë shtesë, akuzë për shpërdorim detyre, kam kërkuar që të pyetem, nuk jam pyetur asnjëherë. Shpresoj që të merrem në pyetje. Motivi politik është në akuzë, nuk është urdhri i ministrit që ka provuar problemin, çdo letër që kam nxjerrë ka ardhur nga pjesa civile dhe ushtarake. Akuzën nuk e pranoj, jam i pafajshëm, demontimi është çështje sigurie kombëtare, si çdo qytetar tjetër kam të drejtën të pyetem për aktet e mia, nuk jam pyetur asnjëherë”, tha ai
