Princ Leka nëpërmjet rrjeteve sociale ka përshëndetur Samitin e BE- Ballkani Perëndimor në Tiranë.
Ky është një vizion i Mbretit Zog I, shkruan Princ Leka në “Facebook”
Postimi i plotë:
Sot është një ditë e bukur për Shqipërinë, një ditë që e presim prej shumë dekadash, një ditë që prindërit dhe gjyshërit tanë kanë bërë çkanë mundur për ta parë të bukur si sot. I uroj suksese vendit tonë në rrugëtimin europian, çelur si premtim paqeje dhe zhvillimi të qendrueshëm për mbarë kontinentin! Në krye të herës së këtij procesi ishin “Etërit themelues”, portretet e të cilëve stolisin sot shumë hijshëm bulevardin e madh të Tiranës, vizion i Mbretit Zog, një arterie që mishëron në këtë ditë përparimin e Shqipërisë drejt Europës. Mes këtyre portreteve më pëlqen të veçoj atë të Joseph Bech, një nga “Etërit themelues të Europës”. Përpara se të kthehej në një prej frymëzuesve të projektit të parë europian si pjesëmarrës në Konferencën e Mesinës më 1955, pararendëse e Traktatit të Romës të 1957-ës, Joseph Bech pati qenë Kryeministër energjik i Dukatit të Madh të Luksemburgut në vitet 1930. Në ato vite ai u dekorua nga Mbreti Zog I me kordonin e madh të Urdhrit të Skënderbeut. Një simbol që tregon vijimësinë e marrëdhënies mes Shqipërisë dhe Perëndimit që aq shumë jemi përpjekur të ndërtojmë me mijëra sakrifica dhe që sot shfaqet më e konsoliduar se kurrë. E paç të mbarë e të frytshëm rrugëtimin tënd drejt shtëpisë së përbashkët europiane, Shqipëri! 🇦🇱 🇪🇺
