Në një intervistë për EuroNews Albania, ish ambasadori amerikan në Shqipëri Aleksandër Arvizu tha se të vetmit që kanë të drejtë të zgjedhin liderin e Opozitës janë shqiptarët, asnjë ambasador apo përfaqësues i vendeve mike e aleate.
Uashingtoni, sipas ish-diplomatit, mundet vetëm të japë opinione, brenda normave të respektit.
“Për mua dhe për çdo ambasador amerikan, e rëndësishme është të tregojmë respekt për qytetarët shqiptarë. Shqiptarët e dinë dhe e kuptojnë fare mirë se çfarë do të thotë të respektohen. Respekti duhet treguar në çdo gjë që bën. është me rëndësi që qytetarët të kuptojnë se, këdo që zgjedhin për një lider politik, mes qeverisë dhe opozitës, nuk është një vendim që i takon Uashingtonit, as qeverive të vendeve anëtare të BE-së, por një vendim që u takon vetëm shqiptarëve. Kjo duhet kuptuar shumë qartë, qytetarë, është opozita juaj, qeveria juaj. Mendoj se përgjegjësia e qeverive mike si SHBA dhe BE, sepse Amerikës i intereson Shqipëria, qoftë demokratë apo republikanë, është e përshtatshme që të japim një opinion me respekt, por këto lloj vendimesh, se kush është në opozitë dhe kush është në qeveri, u takon qytetarëve shqiptarë. Kjo nuk është një zgjedhje amerikane, është një zgjedhje shqiptare dhe këtë dua të shoh. Nëse përfshihet zoti Berisha apo jo, kjo u takon shqiptarëve, por duhet të ketë një përforcim të opozitës në Shqipëri, ndryshe nuk do të ishte mirë për askënd”, theksoi ai.
