Enkelejd Alibeaj përmes një komunikimi publik i është përgjigjur kryeministrit Edi Rama për rastin e koncesionit të Portit të Durrësit.
Këtë rast opozita e ka vënë në shënjestër të kontestimeve duke akuzuar çdo ditë kryeministrin Edi Rama si i përfshirë në këtë aferë.
Berisha e ka quajtur afera e shekullit, ndërsa Meta e ka konsideruar si babëzi e hapur qeveritare.
Rama reagoi sot duke e quajtur gjithë këtë ofensivë si xhelozi armiqësore ndaj transformimit të madh.
Mbas kësaj ka reaguar edhe deputeti Alibeaj, i cili u shpreh:
“Përrallat me transformime të mëdha dhe investitorë strategjikë janë të njëjtat me ato që u thotë shqiptarëve për inceneratorët. Për gati 9 vjet Edi Rama u ka ofruar qytetarëve pallavra për investime ndërsa u ka vjedhur atyre pasurinë publike.
Ua ka vjedhur duke ua bërë dhuratë miqve dhe klientëve të tij. Projekti i portit të Durrësit është dështimi dhe grabitja e radhës së kësaj qeverie që veç largimit i duhet të japë llogari dhe për abuzimet pa fre me pasuritë e shqiptarëve”
