Njoftimi:
Policia e Shtetit / Operacione dhe megaoperacione komplekse policore të finalizuara gjatë këtyre 24 orëve, për të goditur paligjshmëritë në çdo qark të vendit.
✅Operacioni “TENTAKULAT”, në Tiranë, rezultoi me sekuestrimin e 745 g kokainë, 110 g heroinë, 1.3 kg kanabis, 5 peshoreve elektronike, si dhe shumave të parave. Për shpërndarje të drogave në doza, në lokale nate dhe në afërsi të shkollave, u vunë në pranga 15 shtetas.
✅Në kuadër të operacionit “Derveni”, në Krujë, u zbuluan 2 ambiente të përshtatura për kultivim të bimëve narkotike, me anë të llambave. U shpallën në kërkim 3 shtetas (babai dhe 2 djemtë e tij) dhe u gjetën e u asgjësuan 206 bimë narkotike.
✅Si rezultat i operacioneve “Territori” dhe “Distributors”, në Fier dhe në Vlorë, u goditën 5 raste të shpërndarjes së kanabisit, kokainës dhe heroinës, në doza dhe u vunë në pranga 5 shtetas.
-Po në kuadër të operacionit “Territori”, u sekuestrua një armë zjarri (pistoletë) dhe municion luftarak, që i mbante me vete një 18-vjeçar, tashmë i vënë në pranga.
✅Në fushën e krimeve ekonomike, në Korçë u goditën një rast i kontrabandës së naftës, me qëllim tregtimin e saj dhe një rast i përpunimit të kundërligjshëm të brumit në një aktivitet të paregjistruar. Për këto veprimtari të paligjshme u vu në pranga 1 shtetas dhe u procedua në gjendje të lirë një tjetër.
✅U sekuestruan në Morinë, 25000 euro të padeklaruara në kufi, sipas ligjit. Poseduesi i tyre, nën hetim.
✅U finalizua në Gjirokastër, operacioni “Road Guard 49”. Në pranga, 53-vjeçari që u kap në flagrancë duke transportuar 3 emigrantë, me qëllim kalimin e paligjshëm të kufirit.
Megaoperacionet dhe operacionet policore për goditjen e paligjshmërive vijojnë.
