Neim Bega, ish kryetar i bashkisë Ballsh në vitet 2007- 2011, ka shprehur sot vullnetin për t’u futur në primaret që organizon Partia Demokratike brenda saj dhe ambicien për t’u ballafaquar me socialistët në zgjedhjet e 14 majit.
Bega e ka bërë me dije vendimin e tij, në një status lakonik, por të qartë, në “Facebook”
Ai shkruan, se po futet në këtë garë “duke parë situatën e rëndë që kalon vendi në përgjithesi dhe Mallakastra në veçanti”
Postimi i tij:
“Duke parë situatën e rëndë që po kalon vendi në përgjithësi dhe Mallakastra në veçanti shpreh dëshirën të konkurroj dhe unë në Primaret që do të zhvillojë Partia Demokratike për postin e Kryetarit të Bashkisë Mallakastër, për ta bërë garën sa më interesante!”
Kush është Neim Bega ?
Ai ka lindur në Hekal në vitin 1959 dhe është diplomuar në Fakultetin e Edukimit Fizik dhe në Fakultetin e Drejtësisë.
Një ndër emrat e parë për Mallakastrën në lëvizjen demokratike të fundvitit 1990 dhe fillimit të vitit 1991.
Kryetar i PD-së lokale në vitet ’95-’97, drejtor i arsimit Mallakastër në vitet 2005-2007, kryetar i bashkisë Ballsh në vitet 2007-2011 dhe aktualisht në profesionin bazë të tij, mësues në një shkollë 9-vjeçare.
Bega njihet në krahinën e tij si njeri me reputacion, pasionat në sporte, organizimin e klasave sportive dhe spartakiadave.
Në planin e administrimit të pushtetit ka dëshmuar korrektësi dhe nuk ka qenë objekt i penalitetve administrative.
