Shahisti rus 71-vjeçar Anatoli Karpov, ka përfunduar në spital dhe është konfirmuar se ka një dëmtim në kokë, e për rrjedhojë i shtruar në repartin e neurologjisë në spitalin “Sklifosovski” të Moskës.
Shahisti me famë botërore është njëkohësisht edhe deputet i partisë së Vladimir Putin në Dumën ruse,.
Veç tronditjes që ka sjellë ky lajm për një nga figurat më të njohura të këtij sporti, ekziston edhe misteri rreth mënyrës se si ndodhi ky dëmtim i i Karpov.
Mediat e huaja shkruajnë se vajza e tij, Sofia, ka deklaruar se ishte një incident në shtëpi, duke lënë të kuptohet se ai është rrëzuar dhe ka pësuar këtë dëmtim në kokë.
Ndërkohë, në “Telegram” në Rusi u përhap lajmi se ai ishte dërguar pa ndjenja në spital të shtunën, me një dëmtim të dukshëm në kokë dhe nën efektet e alkoolit.
Burimet zyrtare e mohojnë këtë mundësi, por ndërkohë, shefi i Lëvizjes së Sipërmarrësve Rusë, Andrei Kovalev, deklaroi se gjendja e tij ishte kritike. “Lutemi për shëndetin e tij, shpresoj që të kapet agresori”, tha ai në deklarata që janë publikuar në mediat ruse, duke rritur edhe më shumë misterin rreth situatës që çoi në gjendjen e Karpov.
Karpov ishte mbajtësi i titullit botëror nga viti 1975, deri në vitin 1985, duke fituar më shumë se 160 turne në karrierën e tij dhe duke qëndruar për 38 vite në renditjen e 100 më të mirëve në botë.
