Ngjarja ka ndodhur më dt 4 shtator, në zonën e quajtur “Frutikultura”, pranë Laknasit, ku një grua është vetëvarur, ndërsa policia ka vënë në pranga burrin e saj.
Sipas policisë së Tiranës, më datë 04.09.2022, në zonën e Frutikulturës, në banesë dyshohet se është vetëvarur S.L., 55 vjeçe.
Pas ngjarjes, policia, nisur nga dyshimet e krijuara mbi kallëzimin e bërë më datë 05.09.2022, nga familjarët e 55-vjeçares kanë vijuar hetimet e thelluara, për të bërë të mundur zbardhjen e rrethanave të ngjarjes.
Nga verifikimet e kryera, ka rezultuar se më datë 04.09.2022, rreth orës 15:00, në ambientet e banesës së saj, dyshohet se është vetëvarur Sh.L., ndërsa bashkëshorti i saj, nuk ka kallëzuar ngjarjen në polici.
56-vjeçari në mbrëmje ka njoftuar familjarët e viktimës, të cilëve u ka pohuar se gruaja e tij ka pësuar vdekje natyrale dhe ndaj kishte bërë gati të gjitha procedurat e varrimit.
Në përfundim të veprimeve hetimore, specialistët për Hetimin e Krimeve në Komisariatin e Policisë Nr. 5 bënë ndalimin e bashkëshortit po me iniciale Sh.L., i dyshuar për veprat penale “Shkaktimi i vetëvrasjes” dhe “Veprime që pengojnë zbulimin e së vërtetës”.
