Prodhon 29 shishe verë në vit, por një shishe kushton 5000 usd, ndaj s’mund ta pijë kushdo.
Tullio Masoni bën disa nga verërat më ekskluzive në botë, por ai nuk dëshiron që ju ta pini atë.
Një sipërmarrës i suksesshëm, koleksionist arti dhe ish-bankier investimesh, ai krijoi atë që ai thotë se është vreshti më i vogël në botë në majë të një pallati të shekullit të 16-të, në zemër të Reggio Emilia. Qyteti është i famshëm si vendlindja e flamurit kombëtar italian “tringjyrësh”, shkruan CNN.
Është gjithashtu i vendosur midis Parmës dhe Modenës, në një copë toke që i ka dhënë Italisë disa nga eksportet e saj më të njohura, duke përfshirë supermakinat Ferrari dhe Lamborghini dhe produktet kryesore të kuzhinës si lazanja, tortelini, Prosciutto di Parma dhe Ragù alla Bolognese.
Që vera e Masonit nuk përfundon në shumë tavolina me ushqime të tilla, ndoshta ka kuptim kur merren parasysh fillimet e saj. Ai e rrit rrushin e tij në çatinë e Via Mari 10, adresa e ndërtesës dhe emri i vetë verës, një vend i njohur sepse në 1859 u vizitua nga Giuseppe Garibaldi, revolucionari që ndihmoi në bashkimin e Italisë.
“Babai im merrej me prodhimin e verës”, tha ai në një intervistë telefonike. “Kam trashëguar një vresht të vërtetë në fshat rreth Reggio Emilia, por kur pashë librat, kuptova se do të kisha shpenzuar më shumë para për të sesa do të kisha fituar, kështu që e shita”.
“Megjithatë, 20 vjet më vonë u pendova, kështu që e bëra vetë një minivresht”.
Në pak më shumë se 200 metra katrorë, Via Mari 10 jep vetëm 29 shishe verë të kuqe në vit, të cilën Masoni më pas e çmon me 5.000 euro secila. Shishet nuk shiten në një dyqan vere, por në një galeri arti, Bonioni Arte, vetëm disa blloqe më tutje.
“Vera ime është një formë e shprehjes artistike, një provokim filozofik, diçka për t’u mbajtur në dhomën tuaj të ndenjes që të mund të bisedoni për të me miqtë tuaj dhe t’u tregoni atyre për të çmendurin që vendosi një vresht në çatinë e tij”, thotë Masoni.
Ai e krahason vreshtin e tij urban me veprën “Rrota e biçikletës” të artistit francez Marcel Duchamp, një rrotë e vërtetë biçiklete që ai e vendosi në një stol në studion e tij në Paris në vitin 1913.
“Nëse shihni një rrotë biçiklete në dhomën e ndenjes dhe jo në një dyqan riparimi, e kuptoni se sa e bukur është”, tha Masoni. “Vreshti im është i tillë: është e papritur; stimulon trurin; ndez mendime të reja”
Arti i hardhisë Lidhja midis verës dhe artit fillon me frutat, sepse hardhitë rriten në kafaz që në fakt janë vepra arti të bëra nga një skulptor vendas, Oscar Accorsi. “Rrushi im përballet me artin sapo lindin”, tha Masoni. Vera plaket në fuçi lisi, të cilat janë gjithashtu skulptura nga një artist tjetër vendas, Lorenzo Menozzi, dhe kanë për qëllim të përfaqësojnë një burrë dhe një grua. Masoni gjithashtu mori Giuseppe Camuncoli, një artist i njohur i librave komik Marvel, i lindur në Reggio Emilia, për të vizatuar një botim special të etiketës së tij të verërave. Si rezultat, ai inkurajon blerësit e tij që të mos i hapin kurrë shishet, por t’i trajtojnë ato si vepra arti. “Unë jam i vetmi prodhues i verës në botë që thotë se nuk duhet të pini verën e tij,” tha ai.
Hardhitë, të cilat janë Sangiovese, ushqehen me vezë, banane, alga deti dhe jashtëqitje bilbilash, sipas Masonit, por ai thotë se “dieta” e tyre përfshin edhe zërat që vijnë nga lagjja — grindjet, mallkimet dhe dialektet e ndryshme që pasuroni dhe kontaminoni frutin, duke i dhënë një avantazh ndaj rrushit të fshatit, i cili gëzon vetëm heshtje. Masoni hedh poshtë nocionin se vera e tij mund të gjykohet me mjete tradicionale, për shembull duke izoluar shijet në buqetën e saj. “Nuk ka lëkurë apo manaferra të kuqe në verën time,” shpalli ai. Ai nuk mund ta fshehë përbuzjen e tij për ato që ai i konsideron si disa aspekte snobiste të botës së verës, veçanërisht për faktin se shumica e prodhuesve të mëdhenj italianë janë familje fisnike.
Kjo mund të duket në kundërshtim me çmimin e produktit të tij, por ai është pak i ngushtë në lidhje me shifrat aktuale të shitjeve, duke zbuluar se shumica e shisheve ose dhurohen ose shtohen nga galeria Bonioni si dhuratë për blerësit e pjesëve të rëndësishme. Sipas faqes së tij të internetit, kanë mbetur 10 shishe nga vjelja më e fundit, 2019, me shumë nga vitet e mëparshme janë stok”
