Nga Mark Ruci.
Pa frikë mund të pohohet me plot gojën se Gjon Mark Ndoj ishte një nga simbolet e rezistencës karshi regjimit komunist ashtu si në vitet e demokracisë promovoi me aktivitetin e tij, mirëkuptimin dhe nuk rreshti përpjekjet për konsolidimin e një demokracie larg hakmarrjes dhe urrejtjes për shkak të bindjeve politike .
Gjon Mark Ndoji lindi në vitin 1928, në Orosh të Mirditës. Përfundoi liceun “Iliricum” Françeskan në Shkodër dhe nisi punë si mësues.
Për shkak të veprimtarive antikomuniste, ai u arrestua në vitin 1946 dhe u burgos për dy vite. Pasi u lirua në vitin 1948, ai u riarrestua në prill të vitit 1949 për “miqësi me kriminelë” e dogma të tjera komuniste. Teksa 21-vjeçari qëndronte në hetuesi, ai lirohet nga akuzat e para dhe akuzohet direkt për vrasjen e deputetit Bardhok Biba, ngjarje që ndodhi më 17 gusht 1949. Pavarësisht paradoksit kohor, Ndoj u dënua me dy dekada burg, ndërkohë që i shpëtoi vdekje-pushkatimit.
I shleu të gjitha vitet e burgut, periudhë gjatë së cilës u mor me letërsi e përkthime.
Shkroi novela e tregime, si dhe tre drama dyaktëshe: Mujo Ulqinaku, Hasan Riza Pasha dhe Kordiani. Ka përkthyer nga frëngjishtja Historinë e Diplomacisë dhe Histori e Europës Moderne.
Është bashkautor në librin “Mirdita” (1997) dhe Kontakt Poetik (1998).
Ndërsa është autor i veprave: “Kardinal Ahuni”, “Ndëshkimi i pafajësisë”, “Davida e Kulakut”, “Luftëtarët e Mirditës”.
Gjon Mark Ndoji ka qenë kryetari më jetëgjatë i shoqatës të të persekutuarve politikë ndër rrethe, ku në Mirditë e drejtoi nga themelimi në vitin 1991 e deri në vitin 2002, kur dha dorëheqje për shkak të shëndetit të dobët.
Ai ishte në prag të botimit të ditarit dhe të sistemimit të një dorëshkrimi për Kosovën, kur ndërroi jetë në vitin 2006. Gjon Mark Ndoj la pas bashkëshorten Vitore dhe katër fëmijë: Tre djemtë Valentini, Alberti, Leonardi dhe vajzën e vetme, Vera , të cilët duhet të jenë krenar dhe të lehtësuar në zemrat e tyre për emrin dinjitoz dhe kujtimet e mira për babain e tyre .
Realisht jam ndjerë me fat që e kam njohur ( pasi ishte dhe njohje e hershme e babës sim ) , për bashkpunimin dhe miqësinë e sinqertë me të ashtu siç shpreh bindjen se demokratët mirditorë dhe jo vetëm duhet të ndjehen borxhli për një vlerësim dinjitoz ashtu siç e meriton aktiviteti i tij në shërbim të Mirditës .
