Festa e Shëmrisë ose Shëmrajsë në dialektin Lurjan, u festua hareshëm, me praninë e shumë miqëve, nipave, mbesave e dashamirësve të natyrës nga zona të tjera.
Të gjithë ata, që vinin për herë të parë thonin “O sa e bukur qenka”.
Kështu them edhe unë, por thënia nga goja ime është brenda kompleksit të të qenurit Lurjan.
Ndryshimi ka filluar, megjithëse është në hapat e parë.
-Pyjet & turizmi kanë filluar zhvillimin, fìlizëria ka shtuar hovin e saj, pyjet e dushkut jane në gjendje të mirë, pisha e zezë po ashtu duket në gjendje shumë të mirë, ka një filizëri premtuese të arnenit të bardhë, rrobullit, ahut, bredhit.
Ndyshimet klimatike kanë sjellë praninë e disa drurëve që nuk janë endemik, pra nuk ishin më përpara pjesë e florës së zonës.
Në qendrën e Lurës shikoj praninë e vidhit, lajthisë, vërrinit, kishte një zhvillim të madh të shelgut të zi, një shtim në numër të mollës së egër, dardhës së egër, kumbullës së egër, plepit, manit, etjer, duke sjell një gjerdan të gjelbër për lumin e Mallës së Lurës në gjithë gjatësinë e argjinaturës së këtij lumi.
Runja dhe Nezhda përshëndesin njëra tjetrën dhe kanë filluar garën se kush gjelbërohet më shpejtë me mantelin e vetë karakteristikë
Njollat e sipërfaqeve të djegura të Nezhdës e Runjës kërkojnë ndihmë për t’i veshur edhe ato me mantelin e hequr pa drejtësisht.
Liqenet kanë filluar të rrethohen me gardianët e vetë që ishin larguar nga roli i tyre përkohësisht e të rinjtë kanë filluar të marrin stafetën
– Djemtë Lurjan,miqtë e Lurës, nipat dhe mbesat që jetojnë e punojnë nëpër Europë e botë shikonin me mall dhe gëzim ndryshimin e gjendjes.
Vetëm për aq sa qëndruan nuk i hoqën për asnjë moment celularin nga dora, për të marrë me vete një copë Lurë.
– Miqtë, nipat dhe mbesat u pritën siç e ka zakon Lura, me bujari e respekt, e u përcollën me fjalët mirëardhshi vitin tjetër në Lurën më të bukur se sivjet.
Lindjet e vështira përgjithësisht janë të suksesshme, por gjithmonë kërkojnë vëmendjen e mjekut e në këtë rast, mjeku më i mirë është çdo Lurjan për të dhënë kontributin e vetë në formën që ai mendon për ta bërë më të bukur Lurën e gjithë Shqipërisë !
Po, Lurën e gjithë Shqipërisë….
