Ky pallat me murin krejt të çarë ndodhet në një kompleks në Golem të Kavajës.
Kompleksi, nga banorët e tij, është titulluar “Freskia” dhe kështu njihet nga të gjithë në atë zonë plazhi.
Tërmeti i 26 janarit, krahas dëmeve shumë të rënda që bëri në Durrës, Thumanë, Laç, Fushë Krujë, Vorë, Kamëz e Tiranë, preku rëndë edhe Golemin, madje pati edhe dy viktima, në një hotel pranë kompleksit që trajtojmë.
Grupi i ekspertëve që u ngrit për të evidentuar dëmet, konstatoi edhe çarjet e riparueshme te “Freskia”.
Banorët e atyre pallateve, se janë 5 godina brenda kompleksit, shprehen: “Inxhinierët erdhën dhe mbajtën procesverbal për dëmet. Mbas disa kohe, një firmë ndërtimi vuri skelat dhe bëri ca suvatime. Nuk dimë kush firmë ishte dhe sa fonde janë dhënë, por Bashkia Kavajë i dërgonte dhe i kontrolloi ata ndërtues”.
Administratorin e kompleksit e gjejmë duke ujitur disa drurë dekorativë brenda kompleksit.
E quajnë Agin Alushaj dhe s’kishte nevojë ta pyesnim për emrin mbasi ishte i afishuar me gjithë numër telefoni te tabelë treguese e kompleksit.
E pyesim për rastin e pallatit me mur të çarë dukshëm dhe ai shprehet:”Është rrezik shumë i madh, mund të rrëzohet nga çasti në çast dhe aty luajnë fëmijë. Ky është kompleks, që ka 180 apartamente dhe kuptohet sa shumë pushues e banorë që vërtiten në këto hapësira”
E pyesim për riparimet e kryera para disa muajsh dhe Alushaj thotë:” Po, ata erdhën dhe punuan mirë për aq sa bënë, por nuk e di pse nuk vazhduan. Një ditë hoqën skelat e ikën. Nuk di sa fonde u janë dhënë dhe kush i kontrollonte”.
Ndahemi me banorët dhe shqetësimin e tyre po e sjellim në këtë rubrikë të shkurtër me shpresë se organet e pushtetit vendor, por edhe inspektoriatet që e kanë kompetencë, të ndërhyjnë sa pa shkaktuar viktima.
