Presidenti serb Aleksandar Vuçiç ka shpërndarë Parlamentin dhe ka caktuar 25 tetorin si datën e zgjedhjeve të parakohshme parlamentare.
Vendimi vjen pas muajsh protestash masive të udhëhequra nga studentët, të cilët prej kohësh kanë kërkuar zgjedhje të parakohshme.
Me dekretin e firmosur nga Vuçiç, procesi zgjedhor nis më shumë se një vit përpara afatit të rregullt.
Zgjedhjet parlamentare pritej të zhvilloheshin në dhjetor 2027, por kriza politike dhe protestat e vazhdueshme kanë sjellë vendimin për një proces të parakohshëm.
Protestat studentore në Serbi kanë vijuar prej afro dy vitesh dhe janë shoqëruar me kërkesa për përgjegjësi institucionale dhe ndryshime politike.
Lëvizja mori përmasa të mëdha pas shembjes së një tende betoni në stacionin hekurudhor të Novi Sadit në nëntor 2024, ku humbën jetën 16 persona.
Zgjedhjet e 25 tetorit pritet të jenë një test i rëndësishëm politik për Vuçiçin dhe partinë e tij.
Presidenti serb është propozuar nga Partia Përparimtare Serbe për të kandiduar për postin e kryeministrit, duke e bërë procesin zgjedhor edhe më të rëndësishëm për të ardhmen politike të vendit.
Ndërkohë, protestat kanë krijuar presion të vazhdueshëm mbi qeverinë dhe kanë nxitur një debat të gjerë për korrupsionin, funksionimin e institucioneve dhe lirinë e medias. Këto janë akuza të ngritura nga protestuesit dhe opozita, ndërsa Vuçiç dhe aleatët e tij i kanë mohuar.
Tashmë, gara elektorale do të përcaktojë përbërjen e re të Parlamentit serb dhe mund të ndikojë drejtpërdrejt në drejtimin politik të vendit.
