Prej javësh, një pjesë e Evropës po përballet me temperatura rekord. Zjarret kanë shkaktuar qindra viktima dhe kanë djegur më shumë se 7.000 hektarë tokë. Shtete më të prekura janë Franca, Spanja dhe Portugalia, ndërkohë që rrezikohen edhe vende si Italia, Algjeria dhe Maroku.
Rreth 281 viktima përllogaritet se u shkaktuan si pasojë e tymit dhe flakëve në Francë, Portugali dhe Spanjë, ndërkohë që flakët prej javësh kanë përfshirë një pjesë të Europës.
Në Francë zjarret masive janë lokalizuar në rajonin jugperëndimor, ku është bërë i nevojshëm evakuimi i më shumë se 10 mijë personave.
Përhapja e flakëve ishte e shpejtë për shkak edhe të erërave të forta.
Ndërkohë, në Spanjë disa qytete në perëndim janë evakuar dhe zjarrfikësit zhvilluan ndërhyrje në vatrat e zjarrit në qytetin e Monsagro.
Kurse në Portugali më shumë se 30 zjarre ishin aktive të premten në mëngjes, kryesisht në rajonin qëndror të Leiria, i cili është prekur nga kjo situatë prej një jave.
Autoritetet dhe shërbimet e emergjencave janë vënë në lëvizje për të evakuar të rrezikuarit, ndërsa sipas specialistëve dhe mjekëve vdekjet kryesisht ishin nga të moshuarit, fëmijët apo personat që vuajnë nga sëmundet kronike. Instituti Shëndetësor Carlos III në spanjë raportoi për të paktën 43 humbje jetë në dy ditë, përgjatë së shtunës dhe së dielës, ndërkohë që rreziku vijon të jetë prezent.
Italia dhe Kroacia raportuan për prani zjarresh në disa zona, ndërkohë që të rrezikuara mbeten Greqia Qëndrore dhe Maroku.
Shkak i zjarreve vlerësohet se është vala e të nxehtit për shkak të ndryshimeve klimatike.
Ambientalistët thonë se bota është ngrohur me rreth 1.1C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.
