Një tragjedi ka ndodhur mbrëmë në Aschaffenburg. Një afgan 28-vjeçar ka sulmuar me thikë në Aschaffenburg të Gjermanisë një grup fëmijësh të vegjël të një kopshti dhe ka vrarë një 41-vjeçar që u përpoq të mbronte fëmijët si dhe një fëmijë dy-vjeçar. 41-vjeçari është me origjinë gjermane dhe ishte një kalimtar i rastit.
Ndërsa fëmija i vrarë dy-vjeçar ishte me origjinë nga Maroku, bëri të ditur ministri i Brendshëm i Bavarisë, Joachim Herrmann. Sulmuesi ka plagosur me thikë edhe një dy-vjeçare (me origjinë nga Siria) si dhe një grua dhe një burrë, të cilët janë dërguar në spital për trajtim.
Sulmuesi me origjinë nga Afganistani ka ardhur në Gjermani në vitin 2022 dhe ka kërkuar azil politik, por kërkesa e tij është refuzuar. Personi ka qenë në listën për t’u dëbuar nga Gjermania. Ministri bavarez, Herrmann tha se ky person është i njohur edhe për politikën, sepse tre herë ka qenë i përfshirë në akte të dhunshme dhe të tre herët është dërguar për trajtim në psikiatri, por është liruar nga atje. Deri tani nuk ka të dhëna për radikalizimin e tij fetar. Menjëherë kanë reaguar kancelari Scholz dhe të gjitha partitë politike, të cilat kanë kërkuar shpjegim të shpejtë të të gjitha rrethanave. Deri tani nuk dihet asgjë për motivet e sulmit dhe të vrasjeve me thikë, por ngjarja ka shkaktuar debate të mëdha në Gjermani.
Nga DW Shqip
