Prodhuan 11 milionë veshje anti-Covid në Shqipëri. Zbulohet skema korruptive, sekuestrohen 43 mln euro, pranga dy vëllezërve ‘banditë’
Kështu shkruan Nikoleta Kovaçi për panorama.al
Prokuroria italiane ka goditur një rast abuzimi dhe mashtrimi me kostume anti-Covid, për të cilat ishte bërë një tender në Itali, por personat që kanë fituar tenderin i kanë sjellë në Shqipëri.
Për këtë skandal, Prokuroria ka urdhëruar sekuestrimin e plot 43 milionë eurove, ka arrestuar dy persona dhe ka nën hetim dy gra, të përfshira në këtë histori përvetësimi.
Janë mediat vendase që flasin për këtë ndërhyrje duke sjellë detaje të rëndësishme se si operonin në vendin tonë italianët që prodhuan plot 11 milionë veshje njëpërdorimshe anti-Covid, pa asnjë kriter të përcaktuar nga mjekët dhe ekspertët vendas.
“Kriminelët, banditët. Kështu u përcaktuan vëllezërit Samuele dhe Massimiliano Piccolo, të cilët përfunduan në burg me akuzën e mashtrimit, përvetësimit dhe mashtrimit në furnizimet publike.
Ata “kostumet mbrojtëse i bënin me pëlhura të tjera nga ato të certifikuara” dhe, megjithëse Konsorciumi Gap ishte i lidhur kontraktualisht me ‘Made in Italy’, ato i kishin prodhuar në Shqipëri. Përpara importimit të tyre në Itali, “u qepën mëngët dhe u hoqën etiketat”, për të fshehur shkeljen e kontratës.
Sipas të dhënave, rreth 2 milionë kostume përfunduan në ‘ASL Roma 2’, me çmimin 6 deri në 10 euro secila.
