Nuk e di se çfarë do të pohojë Ahmetaj në intervistën e sotshme, por gjithçka që do të thotë Ahmetaj druaj se do të provokojë asgjënë.
Shqiptarët janë tashmë dëshmitarë të bashkësisë së skandaleve të qeverisë rilindase. Një pjesë e mirë e tyre vuajnë mbi shpinë faturën abuzuese të dritave, të ujit, të ushqimeve dhe të pamundësisë për t’i lejuar vetes një javë pushime në vit. Pyetja që lind është; A ka revoltë?! Për fat të keq, jo.
Albert Camus me të drejtë shprehet se fryma e revoltës shprehet me vështirësi, në ato shoqëri ku padrejtësitë janë shumë të mëdha, ose në të kundërt, në ato shoqëri ku padrejtësia është absolute.
Shoqëria shqiptare gjendet prej vitesh përballë gjendjes së Padrejtësisë Absolute e duket se e vetmja revoltë është arratisja nga kjo padrejtësi dhe ngritja e jetës diku në Evropë.
E vetmja zgjidhje për shqiptarët, që duan ende të jetojnë në këtë Shqipëri, është bashkimi dhe kërkesa për dorëheqjen e kryeministrit dhe burgosjen e kryebashkiakut në mënyrë që vendi të kalojë në qeveri teknike dhe shqiptarët të votojnë
atë forcë politike që mendojnë se i përfaqëson më mirë.
Në rast të kundërt, procesi i largimit me
” votë” brenda ose jashtë vendit, me postë kombëtare apo ndërkombëtare qoftë, me lista të hapura apo të mbyllura qofshin, është thjesht një utopi e cila si çdo utopi është e bukur për t’u dëgjuar, por e pamundur për t’u zbatuar, pasi milionat e eurove dhe mafia nuk munden me votë.
Post Scriptum- Nuk ka fort rëndësi se çfarë do të thotë Ahmetaj sot, sa ka rëndësi se çfarë do të bëjnë shqiptarët nesër.
Elona Caslli
