Në mbledhjen e shkuar të Këshillit Bashkiak, u miratua me votat e mazhorancës projekt-vendimi për disa shtesa në buxhet një fond prej rreth 1 milion euro (fonde të rialokuara). Një ndër pikat ishte edhe fondi shtesë prej 7 milion lek të vjetra për koncertin e fundvitit që zhvillohet në teatrin “Migjeni”, por në asnjë moment nuk u mor përgjigja e pyetjes pse kërkohet kjo shtesë përderisa fondi (rreth 11 milion lek) për realizimin e “Ndërmendjes” së këtij fund-viti është miratuar në buxhetin e 2023-shit.
Mbledhjet e Këshillit Bashkiak janë kthyer në një rutinë me pyetje ku nuk merren përgjigje pavarësisht se në fund të sallës radhiten drejtuesit e zyrave/drejtorive që prezantojnë projekt-vendimet që paraqiten në mbledhjen përkatëse. Aty del e flet një drejtues zyre apo drejtorie që shpjegon atë që Ne kemi para syve në material dhe që e kemi lexuar edhe në shtëpi. Kur bën pyetje specifike, është kryetari i Bashkisë ai që të jep një përgjigje përmbledhëse të përgjithshme pa të dhënë mundësinë që të marrësh përgjigjen e pyetjes që ke bërë pasi ‘detajet s’kanë rëndësi’ – thotë kryetari I bezdisur.
Bashkia Shkodër duhet të kuptojë se është një institucion në shërbim të qytetarit dhe se është detyrim (jo dëshirë) të sqarohet çdo banor I Bashkisë Shkodër për çdo qindarkë që harxhohet. Gjithashtu, Bashkia Shkodër duhet të kuptojë se këshilltarët janë të zgjedhurit e këtyre banorëve, dhe se I detyrohet sqarim për çdo pyetje që ka të bëjë me transparencën e taksave të banorëve të territorit që administron Bashkia Shkodër.
Indiferenca ndaj këshilltarëve të zgjedhur është indiferencë ndaj çdo banori, transparenca ndaj këshilltarëve është transparencë ndaj çdo qytetari!
That’s how it should function (kështu duhet të funksionojë)…
Gjithsesi, 7 milion-shi shtesë i kërkuar për “Ndërmendje-n” akoma sot nuk është sqaruar (dhe kjo mungesë transparence ka tendencën të vazhdojë duke parë ecurinë e 2 mbledhjeve të para).
“Ndërmendje” është një ndër aktivitetet më të bukura që I ofrohet publikut shkodran. Një traditë disa vjeçare (prej vitit 2008) e nisur nga ish kryebashkiaku Lorenc Luka e që vazhdon ende sot. Në fillim, u konceptua si një përmbyllje vjetore promovuese e të gjitha punëve, aktiviteteve, realizimeve, investimeve të Bashkisë Shkodër përgjatë një viti, përmes një koncerti madhështor me orkestër simfonike dhe këngëtarë. Përballë publikut herë pas here gjatë aktivitetit paraqitej në një ekran (monitor) e gjithë puna e Bashkisë në një vit por kjo ide u vanit në 2015-tën ku u hoq pjesa e monitorit.
“Ndërmendje” shënon 15 vite ekzistencë, 15 vite të suksesshme por kjo s’do të thotë se një aktivitet kaq I rëndësishëm nuk duhet të ketë transparencë për çdo qindarkë shtesë që kërkon…
