Ambasadori amerikan në Kosovë, Jeffrey Hovenier ka reaguar pas sulmeve të ndodhura ditën e sotme ndaj Policisë së Kosovës ku mbeti i vrarë një efektiv dhe u plagosën dy të tjerë.
“Policia e Kosovës ka legjitimitet të plotë për të garantuar sundimin e ligjit, në përputhje me Kushtetutën dhe ligjet e Kosovës. Ne e pranojmë dhe respektojmë rolin e saj si përgjigja e parë ndaj emergjencave dhe situatave të krizës”, ka thënë ambasadori Hovenier.
Duke e komentuar vrasjene efektivit të policisë, ai është shprehur se autorët e këtyre veprave duhet të mbahen përgjegjës dhe të përballen me drejtësinë.
Hovenier, ka thënë gjithashtu, se e vlerëson koordinimin e vazhdueshëm mes Policisë së Kosovës, misionit të NATO-s në Kosovë, KFOR dhe Misionit të Bashkimit Evropian për Sundim të Ligjit, EULEX.
Ambasadori u ka shprehur ngushëllime familjarëve të policit të vdekur dhe shërim të shpejtë dy të plagosurve.
