Përshtati shqip; Simon Ulndreu
Ibn Battuta konsiderohet “Marco Polo i Orientit”.
Ibn Abu Abdullah Muhamed ibn Battuta (1304-1307), marokieni i quajtur Ibn Battuta, ishte një udhëtar, aventurier, eksplorues, studiues, diplomat dhe reporter me famë botërore në shekullin e 14-të.
Në librin e tij “Rihla”/Udhëtim, ai shkroi një nga veprat më të rëndësishme të mesjetës. Me çdo fjali në kujtimet e tij, Ibn Battuta demonstron një tolerancë dhe hapje të mahnitshme ndaj kulturave të tjera dhe përtej të gjithë kufijve.
Në vitin 1325, 22-vjeçari që kishte studiuar drejtësi në Tangier, Marok u nis për një udhëtim afatgjatë rreth botës, një vit pas vdekjes së Marco Polos. Gjatë 29 viteve që udhëtoi, ai përshkoi më shumë se 120,000 kilometra, tre herë më shumë se bashkëkohësi i tij legjendar i Venecias, Marco Polo. Duke përdorur anije, karroca me kuaj, dhe deve, ai eksploroi Spanjën, Afrikën Lindore, Gjirin Persik, Indinë, Kinën dhe Indonezinë. Ai arriti në Sumatra, Vietnam dhe më në fund Quánzhōu në provincën Fújiàn. Prej andej ai vendosi të kthehej në shtëpi – edhe pse nuk e dinte vërtet se ku binte shtëpia e tij. Pas shumë aventurave, ai u kthye në Tangier, vetëm për të zbuluar se edhe nëna e tij kishte vdekur disa muaj më parë.
Në librin e tij të udhëtimit “Rihla”, Ibn Battuta shkruan sagën e madhe të aventurave të tij, një përzierje shumëngjyrëshe faktesh dhe përrallash:
“U nisa vetëm, pa një shoqërues udhëtimi, shoqëria e të cilit mund të më gëzonte. Nuk kishte gjithashtu asnjë karvan ku mund të bashkohesha. Më shtynte një forcë komanduese dhe një dëshirë e madhe që e kisha mbajtur prej kohësh në gjoksin tim për të vizituar ato faltore të mrekullueshme. Kështu që unë rikonfirmova vendosmërinë time për t’i lënë të gjithë të dashurit e mi vetëm dhe u largova nga shtëpia ime ashtu si zogjtë largohen nga foletë e tyre. Ishte e vështirë për mua të ndahesha nga prindërit e mi.”
Marokeni udhëtoi në kufijtë e botës së panjohur deri atëherë. Lidhja unifikuese e vendeve ku ai udhëtoi ishte Islami, të cilin Ibn Battuta e përshkruan në shkrimet e tij si një fe e përparimit dhe tolerancës…
Ju mund të lexoni më shumë detaje rreth Ibn Batutës këtu:
Burimi*
