459 familje në Tiranë do të kenë mundësi, që përmes programit të kredisë së butë, të marrin një shtëpi.
Këshilli Bashkiak i Tiranës u mblodh sot dhe miratoi vendimin që i vjen në ndihmë direkt familjeve në nevojë dhe çifteve të reja.
KryebashkiakuErion Veliaj, u shpreh se 268 përfitues të tjerë janë në listë pritje për marrjen e kredisë së butë.
Ai premtoi se Bashkia e Tiranës do të jetë përherë pranë familjeve në nevojë.
“Nga thirrja e këtij viti janë deklaruar të rregullta 727 aplikime. Jemi në një stinë lufte, inflacioni dhe krize. Siç qeveria po ndihmon shtresat në nevojë, pensionistët, ndihmën ekonomike, pagesën e aftësisë së kufizuar, detyra jonë është, sidomos me familjet e reja, me studentët apo me abonentët e UKT, të bëjmë tonën, për aq sa të zgjasë kjo krizë. Edhe gjatë pandemisë dhe pas tërmetit prioritet mori ndihma ndaj atyre që kanë një nevojë në situatë krize. Por, nuk do t’i lemë pas dore edhe investimet, me shtrimin e rrugëve, mbjelljet etj. Thjesht u kemi dhënë prioritet shtresave në nevojë. Për këto 459 familje të reja i kemi gati që sot, që të deklarohen fitues, ndërkohë që 268 të tjerë ne do t’i kemi në një listë pritje”, u shpreh Veliaj.
