Pregatiti ing. Bexhet Çobani
( Në Libohovë, Bajroni, ka qënë në datën 17 tetor)
Në letrën nga Preveza, 12 Nëntor 1809, që Lord Bajroni ja dërgon nënës së tij, përshkruan udhëtimin nga Janina në Tepelenë, për të takuar Ali pashë Tepelenën. Ruga e asaj periudhe kalonte nga Janina-Zicë-Delvinaqi- Peshkëpi- Nepravishtë-Libohovë- ura e zonjës-Qestorat-Erind-Dhoksat- Labova e Zhapës-Hormovë-Lekël-Ura e Beçishtit- Tepelenë. Udhëtimi zgjati 9 ditë.
Gojëdhënat thonë se në Libohovë ka qëndruar një natë në sarajet e Shanishasë, ku është shprehur, se në Libohovë kam ngrënë gjellët më të shijshme se në tavernat e Spanjës dhe Portugalisë, dhe kam parë vashat më të bukura. Ndër të tjera Bajroni shkruan: Veziri më priti në këmbë, veçori e madhe nga ana e një myslimani, dhe më uli në krahun e tij të djathtë. Kisha marrë me vete një terxhuman (përkthyes) për raste të veçanta, por këtë herë, një mjek i Aliut, i quajtur Femlario, dhe që e kuptonte latinishten, përmbushi funksionin e duhur. Kërkesa e parë e pashait ishte se përse unë kaq i ri, isha larguar nga vendi im. Shtoi pasandaj se ministri anglez, kapiteni Leake, i kishte thënë se unë vija nga një familje e madhe; dhe m’u lut të përcillja nderimet e tij për time më, dhe unë po ua paraqes ato në emër të Ali Pashait. Më tha se ishte i bindur që unë isha njeri nga sërë e lartë, ngaqë i kisha veshët e vegjël, leshrat me bukle dhe duart të holla e të bardha; nuk e fshehu që sjellja dhe kostumi im i kishin pëlqyer. M’u lut ta konsideroja si një baba, për aq kohë sa do të isha në Shqipëri, duke më siguruar se më shihte si birin e tij; në fakt, më trajtoi si një fëmijë, duke më dërguar njëzet herë në ditë bajame, sherbete, fruta dhe gliko”.
Udhës kaluam afër dy qyteteve, Argjirokastrës dhe Libohovës, të cilat nga sa dukej, nuk qenë shumë më të vegjël se Janina dhe s’ka penë a penel që të mund ti bëjë drejtësi skenës piktoreske në afërsi të Zicës e të Delvinaqit. Më datën 17 Tetor u nisëm në Libohovë dhe arritëm në Qestorat e në Erind. Prej Erindit u nisëm më 19 tetor në orën 3.30 mbasdite.
Pas tri ditëve si mysafirë të Ali Pashës u kthyem po në ate udhë. Shqiptarët ose Albanezët më ranë në sy më fort përmes shëmbëllimit që kanë me malësorët e Skocisë në veshje, në fytyrë dhe në mënyrën e jetesës. Dhe vetë malet e tyre me duken si të Kaledonisë, veçse me klimën më të butë. Fustanella e tyre ndonëse e bardhë, trupi i tyre i hollë dhe i gjatë, dialekti i tyre keltik ne tingullin e tij, zakonet e tyre të rrepta-të gjitha këto më shpunë në Morven. Shqiptarët me petkun e tyre (më të bukurin në botë; me fustanellë të gjatë të bardhë, tallagane të qëndisura me ar me anteri e jelekë kadife të kuqe të qëndisura me oje ari)me jataganë e pisqollë të sermët me feste të gjata.
Shqiptarët në përgjithësi kanë tipare të hijshëm, gratë më të bukura që më kanë rënë në sy, në trup dhe në fytyrë i pamë duke qëruar udhën e mbushur prej rrëkeve midis Delvinaqit dhe Libohovës. Mënyra se si ecin shqiptarët është vërtet teatrale, por ecja e tyre krenare ndoshta vjen nga bruca ose guna që mbajnë në një krah. Flokët e tyre të gjatë më kujtuan Spartanët dhe guximi i tyre në luftë të shpejtë dhe të papritur s’mund të vihet në dyshim.
