Nga Shpetim Axhami, Kryetar i Partisë Lëvizja e Legalitetit
MUAJI NËNTOR ËSHTË AFATI I FUNDIT I KOMISIONIT PARLAMENTAR PËR REFORMËN ZGJEDHORE!
PA ANASHKALUAR PROTESTAT!
THIRRJE PARTISË DEMOKRATIKE DHE ÇDO FORCE TJETËR POLITIKE OPOZITARE!
KËRKOHET SA MË PARË DRAFT PROPOZIMI I PËRBASHKËT OPOZITAR PËR REFORMËN ZGJEDHORE!
KY MUND TË SHËRBEJË EDHE SI HAP I PARË PËR NJË FEDERACION TË PËRBASHKËT ZGJEDHOR!
Muaji nëntor është afati i fundit i punës së Komisionit Parlamentar për Reformën Zgjedhore, afat i shtyrë ky në korrik të vitit 2026, prandaj kjo çeshtje kërkon vëmendje, bashkëpunim dhe këmbëngulje nga i gjithë spektri politik opozitar për të mundësuar ndryshimet e duhura.
Krahas intensifikimit të mbështetjes për protestat aktuale dhe kërkesës për dorëheqjen e Kryeministrit Rama dhe qeverisë së tij, duhet treguar vëmendje dhe përgjegjësi edhe për proceset politike me afat, aq më tepër kur këto lidhen drejtpëdrejtë me atë që faktikisht duhet ndryshuar dhe sot po kërkohet!
Dorëheqja e Kryeministrit dhe ndryshimi i qeverisë nuk e ndërpresin punën e Kuvendit. Deputetët do të vazhdojnë të ushtrojnë mandatet e tyre, kuptohet me urdhëra nga selia rozë, dhe proceset parlamentare do të vijojnë, një i tillë edhe ai i miratimit të Reformës Zgjedhore!
Partia Demokratike, si forca opozitare pjesë e vendimmarrjes për këtë proçes, duhet të marrë iniciativën për përgatitjen e një drafti të përbashkët edhe me propozimet e çdo partie tjetër të spektrit opozitar, për ndryshimin e sitemit dhe ligjit zgjedhor.
Ky draft duhet të mbështetet paraprakisht nga të gjithë si një dakordësi politike për këto çështje themelore:
-Ndryshimi i sistemit zgjedhor:
-Koalicionet parazgjedhore:
-Zgjedhja e kryetarëve të bashkive me mbi 50% të votave të fituara, lista të hapura edhe për këshilltarët bashkiak:
-Dokortësi për ndryshimet kushtetuese të vitit 2008.
-Garanci të tjera demokratike: Depolitizimi i administrimit zgjedhor, mundësia e numërim dhe votim elektronik etj.
Një dakordësi e tillë dhe një draft i përbashkët do të përbënin një hap të rëndësishëm drejt krijimit të një Federacioni të mundshëm Opozitar në zgjedhjet e ardhshme vendore dhe parlamentare.
Ky draft propozim, gjithashtu duhet t’i përcillet zyrtarisht Komisionit Parlamentar për Reformën Zgjedhore, Partisë Socialiste dhe të gjithë faktorëve ndërkombëtarë që asistojnë dhe monitorojnë proceset demokratike në Shqipëri.
Beteja politike për reformën zgjedhore, pavarsisht asaj se ne e dimë se kë kemi përballë, duhet të jetë e përbashkët, e vendosur dhe pa ekuivoke. Opozita duhet të përcaktojë qartë vijat e saj të kuqe dhe kushtet e panegociueshme, duke mos lejuar që reforma të kthehet në një tjetër marrëveshje fasadë, e cila ruan të paprekur mekanizmin aktual të prodhimit të pushtetit.
Nuk mjafton të kërkojmë ndryshimin e qeverisë. Duhet të ndryshojmë edhe rregullat që mundësojnë rotacionin e vërtetë politik.
NËSE NUK NDRYSHOJNË RREGULLAT E ZGJEDHJES, RREZIKOJMË TË PËRSËRISIM TË NJËJTIN REZULTAT!

