Hap televizorin dhe mbi ekranin e madh sheh titra titujsh të ndryshëm. Analizohet situata politike në vend. Ndalesh e dëgjon me vëmendje. Një fjali del nga ekrani e të përplaset në fytyrë- “Edi Rama ka çdo pushtet dhe çështja e inceneratorëve është skandal që do rrëzonte çdo qeveri. Këtë e dimë ne. Çfarë do bëjë Opozita?! ”
E ndërron kanalin. Dëgjon përsëri tē njëjtën gjë. E fik televizorin dhe zbret poshtë për një kafe. Në tavolinën ngjitur dy burra diskutojnë aktualitetin politik dhe riprodhojnë atë çka u tha pak më parë në media.
Me pak fjalë pranojmë me gjakftohtësi të skajshme faktin që çështja e inceneratorëve do rrëzonte çdo qeveri, por nuk ngremë pyetjen ” Çfarë do bëjë Drejtësia”, por ” Çfarë do bëjë Opozita?!
Opozita nuk është Drejtësi dhe Drejtësia nuk është Opozitë. Drejtësia në parim duhet të funksionojë si njësi më vete dhe për sa kohë inceneratorët përbëjnë një vjedhje skandaloze, çdo qytetar që ka vendosur ende të mendojë me kokën e vet dhe jo me kokën e “”Çoroditësve Mediatikë”” që për një rastësi të mbrapshtë quhen ” Analistë”, duhet t’ i bëjë pyetjen vetes; “Çfarë do të bêjë Drejtësia?!”.
Veprimi apo mosveprimi i institucioneve të drejtësisë në një vend normal nuk varen nga performanca politike e Opozitës, që në rastin konkret ka kryer denoncimet në fjalë, por varen nga denoncimet dhe provat përkatëse që janë depozituar për të filluar hetimin e një çështjeje.
Me këtë logjikë për çështjen e inceneratorëve edhe një individ që për disa arsye nuk e ka votuar kurrë Opozitën apo që nuk voton kurrë, sytë për çështjen e inceneratorëve nuk duhet t’i ketë te Drejtësia, por te Opozita?! Mbi ç’rrafsh mund të mbështetet kjo logjikë?! Mbi rrafshin e absurdit besoj unë.
Kur dikujt i vjedhin shtëpinë, denoncimin e bën në polici apo te Partia Opozitare në vend?!
Për çështjen e inceneratorëve ekziston e njëjta logjikë. Nuk mund të pyetet çfarë do të bëjë Opozita, por çfarë do të bëjë Drejtësia për qindra miliona euro që kanë fluturuar në drejtim të paditur.
Nëse paraprakisht pranohet fakti që Drejtësia është shtojcë e Rilindjes, atëherë diskutimi mbyllet këtu.
Opozita nuk mund të zëvendësojë Drejtësinë dhe Drejtësia nuk mund të zëvendësojë Opozitën.
Post Scriptum- Pyetja që duhet të ngrihet 24 orë mbi 24 është; Çfarë do të bëjë Drejtësia për çështjen e inceneratorëve?!
