Kryetarja e Degës së PD-së Sarandë, Manjola Cikuli Nikollo, me një status në rrjetet sociale ngre shqetësimin e gjendjes së kopshteve të fëmijëve në këtë Bashki.
Ajo i drejtohet drejtuesve të Bashkisë si prind dhe kërkon që të vendosen sa më parë kondicionerët mbasi temperaturat janë tepër të larta.
Reagimi i plotë i Cikulit:
Në këto ditë shumë të nxehta, me temperatura që kalojnë 40 gradë celcius, kopshtet e qytetit të Sarandës janë në mëshirë të fatit.
Fëmijët dhe edukatoret po përballen me një situatë shumë të vështirë dhe të papërballueshme nga temperaturat e larta.
Prindërit edhe pse e kanë ngritur disa herë këtë shqetësim në Bashkinë e Sarandës, marin gjithnjë të njëjtën përgjigje:
E kemi gati fondin për të vendosur kondicionerët.
Por kur do bëhet realitet?
Si një prind që i kam rritur fëmijët në këto kopshte, ku çdo fillim muaji i çonim vetë detergjentët për pastrim e deri tek letra higjienike, dua edhe njëherë t’i drejtohem Bashkisë Sarandë.
Edhe për sa kohë akoma do të vazhdojë kjo situatë?
Pagesat e prindërve për të mbuluar mungesat e mjeteve didaktike, higjienike dhe sigurinë në kopshte ngrenë pikëpyetje mbi menaxhimin e fondeve nga Bashkia e Sarandës.
